Ինդոնեզիայում հրդեհի պատճառով փակել են Ճավա կղզու ազգային պարկը

Ինդոնեզիայում իշխանությունները փակել են այցելուների մուտքը Ճավա կղզու Բրոմո-Տենգեր-Սեմերու ազգային պարկ, որտեղ արդեն գրեթե մեկ շաբաթ շարունակվում է անտառային հրդեհը, հաղորդում է AFP-ն։

Հրդեհը սկսվել է երկուշաբթի օրը՝ հանրահայտ զբոսաշրջային տեսարժան վայրի՝ Բրոմո հրաբխի մոտակայքում։ Մինչև այս պահը կրակը ոչնչացրել է պարկի տարածքի շուրջ 176 հեկտարը, հայտնել է Աղետների դեմ պայքարի ազգային գործակալության ներկայացուցիչ Աբդուլ Մուհարին։

Պարկի մուտքը այցելուների համար փակվել է շաբաթ օրը երեկոյան՝ անորոշ ժամկետով։ Տուժածների կամ ավերված օբյեկտների մասին տեղեկություններ չեն ստացվել։

Հրդեհը մարելու համար իշխանությունները գործի են դրել երկու ուղղաթիռ՝ ջուր թափելու սարքավորումներով։ Դրանք աշխատում են այն հատվածներում, որտեղ հրշեջների համար դժվար է հասնել՝ զառիթափ լանջերի և ուժեղ քամու պատճառով։

«Նման պայմաններում ավիացիան կարևոր նշանակություն ունի այն շրջաններ հասանելիություն ապահովելու համար, որոնց հնարավոր չէ արդյունավետ հասնել ցամաքով», — հայտարարել է Մուհարին։

2023 թվականին Բրոմո լեռան վրա բռնկված հրդեհը ոչնչացրել էր ավելի քան 500 հեկտար տարածք։ Այդ ժամանակ հրդեհը սկսվել էր այն բանից հետո, երբ մի զույգ նախահարսանեկան ֆոտոշարքի ժամանակ ազդանշանային հրթիռ էր արձակել։

Ինդոնեզիայի օդերևութաբանական BMKG գործակալությունը կանխատեսում է, որ այս տարի չոր սեզոնը կլինի ավելի ինտենսիվ և երկարատև, ինչը մեծացնում է անտառային հրդեհների և երաշտի ռիսկը։ Գերատեսչությունը պատճառներից մեկը համարում է Էլ Նինյո կլիմայական երևույթը, որը սովորաբար հանգեցնում է ավելի չոր պայմանների Հարավարևելյան Ասիայում և Հնդկաստանում։

Այս տարվա առաջին կեսին Ինդոնեզիայում այրվել է ավելի քան 107 հազար հեկտար տարածք, ինչը ավելի քան կրկնակի գերազանցում է ամբողջ 2023 թվականի հրդեհների տարածքը։