Չեռնոբիլի ԱԷԿ-ը սկսել են նախապատրաստել հնարավոր մարտական գործողությունների

Ուկրաինայի զինված ուժերը սկսել են ակտիվորեն նախապատրաստել Չեռնոբիլի ատոմային էլեկտրակայանի շուրջ գտնվող օտարման գոտին՝ Ռուսաստանի զինված ուժերի հնարավոր հարձակմանը։ Այս մասին գրում է գերմանական Der Spiegel-ը։

Պարբերականի տվյալներով՝ ուկրաինական բանակը տարածքում պատրաստվում է տարբեր հնարավոր սցենարների։ Օտարման գոտում մի քանի կիլոմետրը մեկ անցակետեր են տեղադրված։ Վերջին ամիսներին ուկրաինական ստորաբաժանումները շինարարական տեխնիկայի միջոցով խրամատներ և փոսեր են փորում, ինչպես նաև հատում են մոտակա անտառների ծառերը՝ պաշտպանական կառույցներ կառուցելու համար։

Ուկրաինացի ռազմական ինժեներները նաև ավտոճանապարհների վերևում հատուկ ցանցեր են տեղադրում՝ ռուսական անօդաչու թռչող սարքերից պաշտպանվելու նպատակով։

Der Spiegel-ի հաղորդմամբ՝ Ուկրաինայի զինված ուժերը պայթեցրել են նաև երկաթուղային կամուրջը, որն օգտագործվում էր Չեռնոբիլի ԱԷԿ-ում աշխատող անձնակազմին օտարման գոտուց տեղափոխելու համար։ Դրա հետևանքով կայանի աշխատակիցները ստիպված են բնակվել նախկին վարչական շենքերում ստեղծված ժամանակավոր հանրակացարաններում և տուն վերադառնալ միայն երկու շաբաթը մեկ։

Ավելի վաղ ռազմական վերլուծաբան Սերգեյ Պոլետաևը, անդրադառնալով Բելառուսի տարածքից ռուսական ուժերի հնարավոր նոր հարձակմանը, նշել էր, որ բելառուսական սահմանի մոտ ներկայում տեղակայված են Ուկրաինայի զինված ուժերի տասնյակ հազարավոր զինծառայողներ։