Սպասվում է iPhone 17 սմարթֆոնների թանկացում

Apple կորպորացիան պատրաստվում է բարձրացնել ներկայիս iPhone 17 շարքի սմարթֆոնների գները։ Այս մասին հայտնում է MacRumors-ը՝ հղում անելով Fixed Focus Digital ինսայդերին։

Աղբյուրի տվյալներով՝ ամերիկյան ընկերությունը կարող է վերանայել գնային քաղաքականությունն արդեն երկուշաբթի՝ օգոստոսի 10-ին։ Հնարավոր թանկացման պատճառներից մեկը հիշողության մոդուլների համաշխարհային դեֆիցիտն է։ Առայժմ հայտնի չէ՝ գները կբարձրանան միայն iPhone 17-ի բազային տարբերակի, թե ամբողջ շարքի՝ iPhone 17 Pro-ի, 17 Pro Max-ի և Air-ի համար։

MacRumors-ի լրագրողները նաև նշում են, որ, ըստ շրջանառվող տեղեկությունների, ապագա iPhone 18 շարքի սմարթֆոններն ավելի թանկ կլինեն iPhone 17-ի համեմատ։ Apple-ի ղեկավարությունը գնային փոփոխությունների մասին կարող է հայտարարել սեպտեմբերյան շնորհանդեսի ժամանակ։ Հունիսի վերջին ընկերությունն արդեն բարձրացրել էր իր գրեթե բոլոր արտադրանքների գները՝ բացառությամբ iPhone-ի։

Օգոստոսի սկզբին վերլուծաբան Թիմ Կալպանը նաև հայտարարել էր, որ նոր iPhone-ների առաջին գնորդները կարող են ստիպված լինել երկար սպասել իրենց սարքերի առաքմանը։ Նրա խոսքով՝ պատճառը սմարթֆոնների արտադրության համար անհրաժեշտ օպերատիվ հիշողության դեֆիցիտն է։