Հայտնի է դարձել Իրանի հետ հակամարտությունում ԱՄՆ-ի լուրջ խնդիրների մասին

Իրանի հետ հակամարտության ձգձգմանը զուգահեռ ԱՄՆ-ի հնարավորություններն ու համբերությունը գնալով նվազում են։ Այս մասին հայտարարել է քաղաքական վերլուծաբան և ազգային անվտանգության հարցերով փորձագետ Դևիդ Սանգերը, որի խոսքերը մեջբերում է CNN-ը։

«Կարծում եմ՝ իրանցիները միանշանակ զգում են, որ նախագահ Դոնալդ Թրամփը ցանկանում է ելք գտնել այս հակամարտությունից։ ԱՄՆ-ի զինամթերքը սպառվում է, գործողությունների տարբերակները նվազում են, և, ի վերջո, սպառվում է նաև համբերությունը։ Պատերազմը մեծ ժողովրդականություն չի վայելում նույնիսկ հանրապետականների շրջանում», — նշել է փորձագետը։

Սանգերի կարծիքով՝ Թրամփը փորձում է ցանկացած ճանապարհով հասնել Հորմուզի նեղուցի բացմանը, որպեսզի կարողանա «հայտարարել իր հաղթանակի մասին և հեռանալ», քանի որ ռազմական գործողությունները շարունակվում են արդեն վեցերորդ ամիսը։

ԱՄՆ ռազմաօդային ուժերի պաշտոնաթող գնդապետ Սեդրիկ Լեյթոնն իր հերթին հայտարարել է, որ վարչակազմում «զգալի թվով մարդիկ» կիսում են այս տեսակետը և կարծում են, որ Իրանի հետ պատերազմը պետք է ավարտվի։ Նրա խոսքով՝ Patriot և THAAD համակարգերի համար նախատեսված հրթիռների պաշարների նվազումը «զգալի ազդեցություն» է ունենում Վաշինգտոնի՝ ռազմական գործողություններ իրականացնելու կարողության վրա։

Ավելի վաղ The Wall Street Journal-ը հայտնել էր, որ Թրամփը պատրաստ է հրաժարվել Իրանի հետ միջուկային գործարքից և հայտարարել Վաշինգտոնի հաղթանակի մասին, եթե Թեհրանն ամբողջությամբ բացի Հորմուզի նեղուցը նավերի անցման համար։