20 զոհ և ավերված շենքեր. Կոլումբիայի արևմուտքը ցնցել է 7,4 մագնիտուդով հզոր երկրաշարժը

Երկուշաբթի Կոլումբիայի արևմտյան հատվածում տեղի է ունեցել 7,4 մագնիտուդով հզոր երկրաշարժ, որը շենքերի ավերումներ և բնակչության շրջանում խուճապ է առաջացրել։ Ստորգետնյա ցնցումները զգացվել են ամբողջ երկրում, ինչպես նաև հարևան Էկվադորում, ինչի հետևանքով տեղացիները շտապ լքել են իրենց տներն ու գրասենյակները, հաղորդում է Associated Press գործակալությունը։

ԱՄՆ Երկրաբանական ծառայության (USGS) և Կոլումբիայի համապատասխան գերատեսչության տվյալներով՝ տարերքի էպիկենտրոնը գտնվել է Սան-Խոսե-դել-Պալմար շրջանում (Չոկո դեպարտամենտ), իսկ օջախը տեղակայված է եղել համեմատաբար մեծ խորության վրա։

Պերեյրա, Կալի, Մանիսալես և Կիբդո քաղաքներում լրջորեն տուժել են բնակելի տները, հիվանդանոցները և ենթակառուցվածքային հաստատությունները։ Կալիում փլուզվել է առնվազն 20 շենք, մարդկանց մի մասը մնացել է փլատակների տակ։ Մանիսալեսում ստորգետնյա ցնցումների հետևանքով փլուզվել է նեոգոթական մայր տաճարի աշտարակներից մեկը։

Տեղական իշխանությունների նախնական տվյալներով՝ զոհերի թիվը հասել է առնվազն 20-ի (նրանցից 18-ը՝ Պերեյրայում և 2-ը՝ Մանիսալեսում)։ Տասնյակ մարդիկ վնասվածքներ են ստացել։ Փրկարարներն ու տեղացիները շարունակում են ապամոնտաժել փլատակները՝ ողջ մնացածներին որոնելու համար։

Ստորգետնյա ցնցումները զգացվել են մինչև երկրի մայրաքաղաք Բոգոտա, որտեղ ևս իրականացվել է տարհանում։ Վնասների և անվտանգության սպառնալիքի պատճառով արևմտյան շրջանի մի շարք քաղաքներում օդանավակայանների աշխատանքը ժամանակավորապես դադարեցվել է։

Իշխանությունները քաղաքացիներին կոչ են անում զգույշ լինել՝ կրկնակի ստորգետնյա ցնցումների վտանգի պատճառով։ Երկրի ղեկավարությունը՝ նախագահ Աբելարդո դե լա Էսպրիելյայի գլխավորությամբ, հայտարարել է արտակարգ ծառայությունների մոբիլիզացիայի և տուժած շրջաններում փրկարարական գործողության համակարգման մասին։