Իրանը Հորմուզի օրինագիծը համարում է թշնամիների դեմ ճնշման լծակ

Հորմուզի նեղուցի կառավարման վերաբերյալ իրանական նոր օրինագիծը հստակորեն կտարբերակի բարեկամական և թշնամական երկրները և Թեհրանին կտա ազդեցության լծակներ ոչ բարեկամական երկրների նկատմամբ, ՏԱՍՍ-ին ասել է Իրանի խորհրդարանի ազգային անվտանգության և արտաքին քաղաքականության հանձնաժողովի անդամ Աբոլֆազլ Զոհրավանդը։

«Անկասկած, այս օրենքը հստակ կտարբերակի բարեկամ պետություններին տարածաշրջանի, մասնավորապես՝ Իրանի նկատմամբ թշնամաբար տրամադրված պետություններից», - նշել է նա։

«Ամեն դեպքում, եթե նրանք մտադիր են միակողմանի և անարդար պատժամիջոցներ կիրառել մեր դեմ, մենք նույնպես կկարողանանք օգտագործել այս ներուժն ու այս լծակը նրանց դեմ», - հավելել է իրանցի պատգամավորը։ Նրա կարծիքով, այս օրինագիծը մեծապես կօգնի Իսլամական Հանրապետությանը երկկողմ հարաբերությունները կարգավորելու հարցում։

Օգոստոսի 7-ին Իրանի խորհրդարանի նախագահության անդամ Ալիռեզա Սալիմին հայտարարեց, որ Իրանի խորհրդարանը քննարկում է մի օրինագիծ, որը կարգելի ԱՄՆ-ի և Իսրայելի հետ կապված նավերի անցումը Հորմուզի նեղուցով։