Հայաստանը քննարկում է Իրանից և Ադրբեջանից գազի ներկրման հնարավորությունը

Հայաստանը բանակցություններ է վարում այլընտրանքային մատակարարներից գազ գնելու շուրջ՝ ռուսական գազից կախվածությունը նվազեցնելու նպատակով։ Այս մասին հայտարարել է «Քաղաքացիական պայմանագիր» կուսակցության անդամ Սարգիս Խանդանյանը, փոխանցում է «Ինտերֆաքսը»։

Խոսքը Իրանի և Ադրբեջանի մասին է։ Խանդանյանի խոսքով՝ մատակարարումների դիվերսիֆիկացումը կարևոր է, մասնավորապես այն դեպքում, եթե Ռուսաստանը որոշի բարձրացնել Հայաստան մատակարարվող գազի գինը։

Իրանական գազի ներկրման ծավալների ավելացման հնարավորությունը քննարկվել է հուլիսին՝ ՀՀ տարածքային կառավարման և ենթակառուցվածքների նախարար Դավիթ Խուդաթյանի՝ Իրան կատարած այցի ընթացքում։ Խանդանյանի խոսքով՝ հետագայում հնարավոր է նաև ադրբեջանական գազի մատակարարում՝ TRIPP («Թրամփի ուղի») նախագծի շրջանակում նախատեսվող նոր խողովակաշարի միջոցով։

Ռուսաստանի և Հայաստանի հարաբերությունների սառեցման ֆոնին Մոսկվան նախկինում հայտարարել էր, որ Երևանի՝ Եվրամիությանն ինտեգրվելու կուրսի շարունակման դեպքում կարող են վերանայվել Հայաստանի համար գործող մի շարք արտոնություններ, այդ թվում՝ ռուսական գազի մատակարարման պայմանները։