Թուրքիան առաջարկել է հացահատիկի նոր գործարք կնքել

Սև ծովում լարվածության սրումը կարող է Թուրքիայում պարենային ապրանքների գների կտրուկ աճի պատճառ դառնալ։ Այս մասին հայտարարել է Թուրք-ուկրաինական գործարար խորհրդի ղեկավար Իսմայիլ Զիա Ուզելը։

Նրա խոսքով՝ նման իրավիճակից խուսափելու համար անհրաժեշտ է ստեղծել նախկին հացահատիկային գործարքի նման նոր մեխանիզմ։ Դա Անկարային հնարավորություն կտա պահպանել ալյուրի և մակարոնեղենի արտահանման ոլորտում իր առաջատար դիրքերը։ Ուզելը զգուշացրել է, որ խնդիրը չլուծելու դեպքում Սև ծովում ստեղծված ճգնաժամի հետևանքները կարող են համեմատելի լինել Հորմուզի նեղուցի փակման հետևանքների հետ։

Նա նաև հիշեցրել է, որ Ռուսաստանից և Ուկրաինայից ցորենի մատակարարումները միասին կազմում են համաշխարհային շուկայի մոտ 32 տոկոսը։

Ավելի վաղ կանխատեսվել էր, որ Ազով-Սևծովյան ավազանից բեռնափոխադրումների հետ կապված դժվարությունների պատճառով օգոստոսին ռուսական հացահատիկի արտահանումը կարող է նվազել մինչև շուրջ 2,5 միլիոն տոննա։