McDonald's-ի և մյուս արագ սննդի ցանցերի զեղչերն այլևս չեն գրավում հաճախորդներին

ԱՄՆ-ում արագ սննդի խոշոր ցանցերը բախվել են նոր խնդրի․ միայն ցածր գներն ու զեղչային առաջարկներն այլևս բավարար չեն հաճախորդներին վերադարձնելու համար։ Reuters-ի փոխանցմամբ՝ երկրորդ եռամսյակի արդյունքները ցույց են տվել, որ ավելի հաջող են այն ընկերությունները, որոնք մատչելի առաջարկները համատեղում են նոր ուտեստների, սննդի որակի և սպասարկման բարելավման հետ։

Վերջին երկու տարիներին գնաճի պատճառով սպառողները ավելի ակտիվ էին փնտրում էժան տարբերակներ, ինչի հետևանքով արագ սննդի ցանցերը մեծացրել էին զեղչային առաջարկները։ Սակայն McDonald's-ում, չնայած 3 դոլարից ցածր արժեքով մենյուին և 4 դոլարանոց նախաճաշին, համաշխարհային համադրելի վաճառքներն աճել են ընդամենը 1,3 տոկոսով։ Միևնույն ժամանակ Taco Bell-ի նույն ռեստորաններում վաճառքներն աճել են 7 տոկոսով։ Ընկերությունը հաճախորդներին առաջարկել է 5, 7 և 9 դոլարանոց հավաքածուներ՝ միաժամանակ պարբերաբար թարմացնելով մենյուն։

Որոշ այլ ցանցերում զեղչերը նույնպես չեն կարողացել կանխել վաճառքի անկումը։ Wendy's-ի՝ ԱՄՆ-ում նույն ռեստորանների վաճառքները նվազել են 7 տոկոսով, իսկ Wingstop-ինը՝ 7,5 տոկոսով՝ չնայած մեկ դոլարանոց հավի թևիկների առաջարկին։ Մասնագետների գնահատմամբ՝ գնորդներն արդեն ավելի ուշադիր են համեմատում գինը, որակը, սպասարկումն ու առաջարկվող սնունդը։

Ավելի հաջող արդյունքներ է գրանցել Burger King-ը, որը զեղչային առաջարկները համատեղել է սպասարկման և սննդի որակի բարելավման հետ։ Մասնագետների խոսքով՝ արագ սննդի շուկայում հաջողության համար այլևս պարտադիր չէ լինել ամենաէժանը․ հաճախորդների համար կարևոր են նաև հարմարավետությունը, սպասարկման մակարդակը և մենյուի նորությունները։