On սպորտային ապրանքանիշի բաժնետոմսերը կտրուկ անկել են վաճառքների թուլացման ֆոնին

Շվեյցարական On սպորտային ապրանքանիշը երկրորդ եռամսյակում չի արդարացրել վաճառքների վերաբերյալ վերլուծաբանների կանխատեսումները, ինչի հետևանքով ընկերության բաժնետոմսերը վաղ առևտրի ընթացքում անկել են 21 տոկոսով։ Այս մասին հայտնում է Reuters-ը։

Հունիսի 30-ին ավարտված եռամսյակում ընկերության զուտ վաճառքները կազմել են 850,3 մլն շվեյցարական ֆրանկ՝ վերլուծաբանների կանխատեսած 878,16 մլն ֆրանկի փոխարեն։ On-ի խոշորագույն շուկայում՝ Ամերիկայում, վաճառքների աճը նախորդ եռամսյակի 17 տոկոսից դանդաղել է մինչև 13 տոկոս։ Միևնույն ժամանակ Ասիա-խաղաղօվկիանոսյան տարածաշրջանում վաճառքներն աճել են 54,7 տոկոսով։

Ռոջեր Ֆեդերերի աջակցությունը վայելող ապրանքանիշի վրա ազդում են ԱՄՆ մաքսատուրքերի հետևանքով աճած ծախսերն ու սպառողների ավելի զգուշավոր վարքագիծը։ Չնայած դրան՝ ընկերությունը չի պատրաստվում վաճառքների ծավալն ավելացնելու համար դիմել մեծ զեղչերի և ցանկանում է պահպանել պրեմիում ապրանքանիշի դիրքը։

On-ը բարձրացրել է ամբողջ տարվա համախառն շահույթի մարժայի կանխատեսումը՝ 64,5 տոկոսից հասցնելով առնվազն 65 տոկոսի։ Միաժամանակ տարեկան վաճառքների կանխատեսումը սահմանվել է 3,47-3,56 մլրդ շվեյցարական ֆրանկի միջակայքում։ Ընկերության բաժնետոմսերի գինը նվազել է մինչև մոտ 30,30 դոլար՝ հասնելով գրեթե երկու տարվա նվազագույն մակարդակին։