Wildberries-ի պահեստներին հարվածները կարող են Կրեմլին բարդ ընտրության առաջ կանգնեցնել․ Reuters

Ուկրաինական անօդաչուների՝ ռուսական Wildberries առցանց առևտրի հարթակի պահեստներին հասցված հարվածները կարող են ոչ միայն տնտեսական վնաս պատճառել ընկերությանը, այլև լրացուցիչ ճնշում ստեղծել Ռուսաստանի ֆինանսական համակարգի վրա։ Այս մասին ասվում է Reuters Breakingviews-ի վերլուծական հոդվածում։

Հրապարակման համաձայն՝ վերջին շաբաթներին Wildberries-ի առնվազն 20 պահեստ է ենթարկվել հարձակման, իսկ ռուսական լրատվամիջոցների գնահատմամբ՝ ընկերությունը կորցրել է իր պահեստային տարածքների գրեթե 30 տոկոսը։ Հարվածների ուղղակի տնտեսական վնասը գնահատվում է 2-4 մլրդ դոլար։ The Bell-ի գնահատմամբ՝ ընկերության վաճառքներն արդեն նվազել են մոտ 25 տոկոսով։

Wildberries-ը Ռուսաստանի խոշորագույն առցանց առևտրի հարթակն է․ նախորդ տարի դրա միջոցով վաճառված ապրանքների ընդհանուր արժեքը կազմել է մոտ 75 մլրդ դոլար, ինչը համարժեք է Ռուսաստանի ՀՆԱ-ի շուրջ 3 տոկոսին։ Հարվածների հետևանքները կարող են անդրադառնալ նաև հարթակից կախված տասնյակ հազարավոր վաճառողների վրա։ Ընկերության հիմնադիր Տատյանա Կիմը հայտնել է, որ Wildberries-ը ապահովագրված չէ ահաբեկչական գործողություններից առաջացած վնասներից, ինչի պատճառով պահեստներում ապրանք կորցրած վաճառողները փոխհատուցում չեն ստանա։

Ռուսաստանի Կենտրոնական բանկն արդեն բանկերին առաջարկել է վերակառուցել հարձակումներից տուժած փոքր և միջին ձեռնարկությունների վարկերը և նրանցից ուշացման տույժեր չգանձել։ Sberbank-ն իր հերթին հայտնել է, որ կարող է ստիպված լինել մեծացնել խնդրահարույց վարկերի համար նախատեսված պահուստները։

Reuters Breakingviews-ը նշում է, որ եթե իրավիճակը շարունակվի, Ռուսաստանի կառավարությունը կարող է ստիպված լինել ֆինանսապես միջամտել։ Միևնույն ժամանակ երկրի բյուջետային վիճակն արդեն բարդացել է․ 2026 թվականի առաջին կիսամյակում բյուջեի պակասուրդը հասել է ՀՆԱ-ի 2,5 տոկոսին՝ արդեն գերազանցելով ամբողջ տարվա համար նախատեսված մակարդակը։