Եգիպտոսում աշխատողներ տեղափոխող ավտոմեքենաների բախման հետևանքով 18 մարդ է զոհվել

Եգիպտոսի Իսմայիլիա նահանգում 18 մարդ է զոհվել, շուրջ 30 մարդ էլ վիրավորվել են վարձու աշխատողներ տեղափոխող երկու ավտոմեքենաների բախման հետևանքով, հայտնում է տեղական Ahram Online լրատվամիջոցը։

Վթարը տեղի է ունեցել Ալ-Դավավիս ճանապարհին՝ «Ալ-Շաբաբ» էլեկտրակայանի հարևանությամբ։ Նախնական տվյալներով՝ մարդիկ գնում էին աշխատանքի։

Տուժածներին տեղափոխել են Ալ-Կասասինի կենտրոնական հիվանդանոց։ Եգիպտոսի առողջապահության նախարարությունը հայտնել է, որ բուժհաստատությունները բերվել են բարձր պատրաստականության, իսկ տուժածներին ցուցաբերվում է անհրաժեշտ օգնություն։

Դեպքի վայր են ժամանել անվտանգության ուժերի աշխատակիցներն ու շտապօգնության բրիգադները։ Իշխանությունները սկսել են հետաքննություն՝ վթարի հանգամանքները պարզելու և պատասխանատվությունը որոշելու համար։

Եգիպտոսի սոցիալական համերաշխության և աշխատանքի նախարարություններին հանձնարարվել է տեղեկություններ հավաքել զոհվածների և տուժածների մասին ու որոշել անհրաժեշտ օգնության ծավալը։

Զոհվածների ընտանիքներին կտրամադրվի ֆինանսական աջակցություն, իսկ տուժածներին՝ օգնություն՝ կախված ստացած վնասվածքների ծանրությունից։

Եգիպտոսի Հանրային մոբիլիզացիայի և վիճակագրության կենտրոնական գործակալության տվյալներով՝ 2025 թվականին երկրում ճանապարհատրանսպորտային պատահարների հետևանքով զոհվել է 5829 մարդ, ինչը 10,8%-ով ավելի է նախորդ տարվա ցուցանիշից։ Տուժածների թիվն աճել է 10,7%-ով և հասել 84 հազար 553-ի։