Մահացել է Toyota-ի նախկին ղեկավար՝ ընկերությունը համաշխարհային ավտոհսկայի վերածած Հիրոսի Օկուդան

Toyota Motor Corporation-ի տնօրենների խորհրդի նախկին նախագահ Հիրոսի Օկուդան մահացել է 93 տարեկան հասակում, հայտնում է Kyodo News-ը։ Մահվան պատճառը առայժմ չի բացահայտվում։

Ինչպես նշում է Reuters-ը, Օկուդան Toyota-ի այն սակավաթիվ ղեկավարներից էր, որոնք չէին պատկանում ընկերության հիմնադիրների ընտանիքին։ 1995 թվականին գլխավորելով Toyota-ն՝ նա առանցքային դեր խաղաց արտերկրում դրա արտադրության ընդլայնման և ճապոնական ավտոարտադրողին համաշխարհային առաջատարներից մեկի վերածելու գործում։

Ընկերության նախագահի պաշտոնում Օկուդան բախվեց ճապոնական արտահանման անկման և իենի ամրապնդման հետ։ Ի պատասխան՝ նա շեշտը դրեց հիմնական արտասահմանյան շուկաներում արտադրական հզորությունների ստեղծման վրա, ինչը հնարավորություն տվեց զգալիորեն ավելացնել վաճառքները։ Նրա օրոք նաև արագացվեց Prius հիբրիդային ավտոմեքենայի մշակումը, որը շուկա դուրս եկավ 1997 թվականին՝ նախնական ծրագրից մեկ տարի շուտ։

1996 թվականին Օկուդան գործարկեց Vision 2005 ռազմավարությունը, որը նախատեսում էր ինժեներական ծախսերի կրճատում և արտահանումից կախվածության նվազեցում՝ արտադրությունն անմիջապես առանցքային արտասահմանյան շուկաներ տեղափոխելու հաշվին։ Տասը տարվա ընթացքում Toyota-ի արտասահմանյան վաճառքներն ավելի քան կրկնապատկվեցին, իսկ ընկերության գլոբալ վաճառքներն աճեցին 67%-ով։

Օկուդան նաև չէր վախենում բացահայտ քննադատել ընկերության ղեկավարությանը և Տոյոդա ընտանիքի ազդեցությունը։ Մասնավորապես, նա հրապարակավ հանդես եկավ Toyota-ի հիմնադրի թոռան՝ Ակիո Տոյոդայի ավտոմատ առաջխաղացման դեմ՝ հայտարարելով, որ նա պետք է ապացուցի ընկերությունը ղեկավարելու իր ունակությունը, այլ ոչ թե ստանա այդ պաշտոնը ծագման իրավունքով։

Օկուդան ծնվել է 1932 թվականին Միե պրեֆեկտուրայում։ Toyota է եկել 1955 թվականին՝ աշխատանքը սկսելով հաշվապահական ստորաբաժանումում։ 1995 թվականին նա դարձավ ընկերության գրեթե երեք տասնամյակի ընթացքում առաջին ղեկավարը, որը չէր պատկանում Տոյոդա ընտանիքին։

1999 թվականին Օկուդան զբաղեցրեց Toyota-ի տնօրենների խորհրդի նախագահի պաշտոնը և այդ պաշտոնում մնաց մինչև 2006 թվականը։ 2002-2006 թվականներին նա նաև ղեկավարում էր Ճապոնիայի խոշորագույն բիզնես-ասոցիացիան՝ Keidanren-ը։ 2012 թվականին Օկուդան դարձավ Ճապոնիայի միջազգային համագործակցության բանկի նախագահ և այդ պաշտոնը զբաղեցրեց մոտ մեկ տարի։

Ակիո Տոյոդան հետագայում գլխավորեց Toyota-ն որպես նախագահ 2009 թվականին, իսկ 2023 թվականին դարձավ տնօրենների խորհրդի նախագահ։