Հալաբյան փողոցում լքված նորածնի մորը երկրորդ օրն է՝ չեն գտնում

Երևանի Հալաբյան փողոցի 13-րդ շենքի մոտ հայտնաբերված նորածնի մորը իրավապահները դեռ չեն հայտնաբերել։ ՆԳՆ-ից հայտնել են, որ որոնողական և պարզման աշխատանքները շարունակվում են։

Նորածին աղջիկը օգոստոսի 10-ին հայտնաբերվել էր շորի մեջ փաթաթված՝ շենքի մոտ գտնվող խաղահրապարակում՝ երկաթե թիթեղների տակ։ Ոստիկանների և շտապօգնության արագ արձագանքի շնորհիվ երեխան տեղափոխվել էր բժշկական կենտրոն։

Բժիշկները սկզբում երեխայի վիճակը գնահատել էին ծանր․ նրա մարմնի ջերմաստիճանը եղել էր մոտ 30 աստիճան, արձանագրվել էին նաև շնչառական խնդիրներ։ Երեխան տեղափոխվել էր վերակենդանացման բաժանմունք և շնչառությունը ստացել էր CPAP համակարգի միջոցով։ Ավելի ուշ բժիշկներին հաջողվել էր կայունացնել նրա վիճակը։

Դեպքի առթիվ նախաձեռնվել է քրեական վարույթ, իրականացվում է նախաքննություն։ Իրավապահները շարունակում են պարզել երեխայի մոր ինքնությունը և դեպքի բոլոր հանգամանքները։