Բանակի նոր համազգեստը դեռ չի հասել բոլոր զինծառայողներին․ ՊՆ-ն ժամկետ չի հայտնում

Հայաստանի զինված ուժերում նոր համազգեստի ամբողջական ներդրման գործընթացը դեռ ավարտված չէ, իսկ Պաշտպանության նախարարությունը դրա վերջնական ժամկետի վերաբերյալ հստակ պատասխան չի տալիս․ փոխանցում է Sputnik Արմենիան։

ՊՆ-ից հայտնել են, որ գործընթացը պայմանավորված է նոր համազգեստների զորային փորձարկումների, կառուցվածքի և տեխնիկական բնութագրերի ուսումնասիրության արդյունքներով։ Փորձնական խմբաքանակները տրամադրվել են տարբեր ստորաբաժանումների զինծառայողներին, այդ թվում՝ ժամկետային զինծառայողներին և բարձրագույն սպայակազմին։

Գերատեսչությունից վստահեցրել են, որ ամբողջ անձնակազմին նոր համազգեստով ապահովելու աշխատանքները շարունակվում են։ Միաժամանակ նշել են, որ ամբողջական ներդրման ժամկետների մասին կտեղեկացնեն միայն այն ժամանակ, երբ դրանք վերջնականապես հստակեցված լինեն։

Նոր համազգեստի ներդրման մասին դեռ 2023 թվականին հայտարարել էր պաշտպանության նախարար Սուրեն Պապիկյանը՝ նշելով, որ նպատակ կա գործընթացն ավարտել մինչև 2024 թվականի վերջը։ 2025 թվականի վերջին արդեն ցուցադրվել էր ամերիկյան «Milliken & Company»-ի արտադրած նոր համազգեստների առաջին խմբաքանակը։