Փաշինյան․ Առողջության համընդհանուր ապահովագրության ներդրումից այս փուլում բավարար գոհունակություն ունենք

Վարչապետ Նիկոլ Փաշինյանի գլխավորությամբ տեղի ունեցած խորհրդակցության ընթացքում քննարկվել են Առողջության համընդհանուր ապահովագրության համակարգի ներդրման շրջանակում 2027 թվականին նախատեսվող քայլերը։

Քննարկվել է մինչև 200 հազար դրամ ամսական աշխատավարձ ստացող քաղաքացիներին համակարգում ներառելու հնարավորությունը, ինչպես նաև ապահովագրավճարների վճարմանը գործատուների ներգրավման և պետական սուբսիդավորման քաղաքականության շարունակության հարցերը։

Փաշինյանը ներկայացրել է 2027 թվականի հունվարի 1-ից մինչև 200 հազար դրամ աշխատավարձ ստացողների համար քննարկվող տարբերակը։ Ըստ դրա՝ 10 800 դրամ ապահովագրավճարից 4 400 դրամը կարող է սուբսիդավորել պետությունը, 2 000 դրամը՝ վճարել աշխատողը, իսկ մնացած 4 400 դրամը՝ գործատուն։

Վարչապետի խոսքով՝ 2028 թվականից կարող է կիրառվել այլ մոտեցում, որի դեպքում աշխատողը կվճարի 6 000 դրամ, սակայն այդ գումարը հետ կստանա սոցիալական կրեդիտի միջոցով՝ համընդհանուր հայտարարագիրը լրացնելու պայմանով։

Փաշինյանը նշել է, որ Կառավարության նպատակն է մինչև 2029 թվականի հունվարի 1-ը բնակչության բոլոր շերտերին ներառել առողջության համընդհանուր ապահովագրության համակարգում։ «Այս փուլում Առողջության համընդհանուր ապահովագրության համակարգի ներդրումից ունենք բավարար գոհունակություն, բայց պետք է հասկանանք, որ այն դինամիկ համակարգ է, որը պետք է մշտապես ուղեկցվի և զարգացվի»,- ասել է նա։