Զալցբուրգում գողացել են Մոցարտի 320 ոսկե արձանիկներից 210-ը

Աշխարհ 12 Օգոստոս, 2026 23:30

Վոլֆգանգ Ամադեուս Մոցարտի ծննդավայր Զալցբուրգում անհայտ անձինք գողացել են կոմպոզիտորի 320 փոքր ոսկե արձանիկներից 210-ը, որոնք տեղադրված էին նրա 270-ամյակին նվիրված ցուցահանդեսի շրջանակում, հայտնում է Associated Press-ը՝ հղում անելով կազմակերպիչների հայտարարությանը։

50 սանտիմետրից ցածր բարձրությամբ արձանիկները ստեղծել է գերմանացի կոնցեպտուալ նկարիչ Օտմար Հյորլը։ Յուրաքանչյուրի վրա պատկերված է Մոցարտը՝ իր սիրելի Պիմպերլ շան հետ միասին։ Ցուցադրությունը բացվել է հուլիսի 15-ին կոմպոզիտորի նախկին տան այգում, ինչպես նաև նրա բնակելի սենյակներում և մի քանի տաղավարներում։

Ընդամենը առաջին երկու շաբաթվա ընթացքում անհետացել է ավելի քան 80 արձանիկ, իսկ օգոստոսի 12-ի դրությամբ դրանց թիվը հասել է 210-ի։ Նկարիչը հայտարարել է, որ տեղի ունեցածը չի համարում այցելուների սովորական գողություն և ենթադրել է, որ խոսքը կարող է կազմակերպված հափշտակության մասին լինել։

«Ամենավատ բանը նկարչի համար այն է, երբ նրա աշխատանքն անհետանում է»,- ասել է Հյորլը գերմանական dpa գործակալությանը։

Միաժամանակ, գողացված արձանիկները դժվար թե մեծ նյութական արժեք ներկայացնեն։ Ցուցահանդեսի ավարտից հետո նախատեսվում էր դրանք վաճառել հատը մոտ 100 եվրոյով։ Կազմակերպիչները գողության դեպքերի համար պատրաստել էին մի քանի պահեստային արձանիկներ, սակայն դրանք բավարար չեն եղել կորուստները լրացնելու համար։ Բացի դրանից, արձանիկների արտադրողը ներկայում արձակուրդում է, ուստի նոր արձանիկներ արագ պատրաստել չի հաջողվել։

Ցուցահանդեսը, որտեղ մնացած արձանիկներն այժմ տեղադրված են զգալիորեն ավելի սակավ, պետք է շարունակվի մինչև օգոստոսի 30-ը։

Հյորլի համար դա նրա ստեղծագործությունների զանգվածային գողության առաջին դեպքը չէ։ Ավելի վաղ գերմանական Բայրոյթում տասը օրվա ընթացքում անհետացել էր նրա քանդակների մի ամբողջ շարք, որոնք պատկերում էին կոմպոզիտոր Ռիխարդ Վագներին։

Նկարիչը պարզաբանել է, որ Մոցարտի արձանիկների ստեղծումն իր համար կոմպոզիտորին հերթական հուշարձանը կանգնեցնելու փորձ չէր։ Նա նշել է, որ ինքը ցանկացել է ցույց տալ Մոցարտի մարդկային կողմը՝ «սովորական մարդու, չնայած նրա հանճարեղությանը»։ Մոցարտը ծնվել է Զալցբուրգում 1756 թվականի հունվարի 27-ին։