Գերմանիան պատասխանել է ռուսական նավերի վերաբերյալ Պուտինի կոշտ նախազգուշացմանը

Գերմանիան և Եվրամիության մյուս երկրները կշարունակեն պայքարը Ռուսաստանի այսպես կոչված «ստվերային նավատորմի» դեմ՝ ԵՄ պատժամիջոցային քաղաքականության շրջանակում։ Այս մասին Lenta.ru-ի հարցմանն ի պատասխան հայտարարել են Մոսկվայում Գերմանիայի դեսպանատնից՝ մեկնաբանելով ռուսական նավերի առգրավման դեպքում պատասխան քայլերի դիմելու մասին ՌԴ նախագահ Վլադիմիր Պուտինի նախազգուշացումը։

Դեսպանատանը նշել են, որ Գերմանիայի կառավարությունը գործընկերների հետ ձգտում է կանխել Ուկրաինայում ռազմական գործողությունների պատճառով Ռուսաստանի դեմ սահմանված եվրոպական պատժամիջոցների շրջանցումը։ Այդ նպատակով ձեռնարկվող քայլերի թվում են նաև «ստվերային նավատորմի» նավերի դեմ գործողությունները։ Միաժամանակ գերմանական կողմը շեշտել է, որ գործելու է միջազգային իրավունքի սկզբունքներին համապատասխան։

Ավելի վաղ Պուտինը ռուսական նավերի հնարավոր առգրավման վերաբերյալ արևմտյան երկրների ծրագրերը որակել էր «ծովահենություն և ավազակություն»՝ խոստանալով նման գործողություններին համարժեք պատասխան տալ։ Նա նաև զգուշացրել էր, որ Մոսկվայի պատասխան քայլերը կարող են իրականացվել ոչ միայն այն ջրային տարածքներում, որտեղ ռուսական նավերի դեմ գործողություններ կձեռնարկվեն։