Էտնա հրաբխի ակտիվության պատճառով Իտալիայի զբոսաշրջության ոլորտի վնասը կարող է հասնել 24 մլն եվրոյի

Իտալիայի Սիցիլիա կղզու զբոսաշրջության ոլորտը Էտնա հրաբխի շարունակվող ակտիվության հետևանքով կարող է մինչև 24 միլիոն եվրոյի վնաս կրել։

Իտալիայի փոքր և միջին բիզնեսի սեփականատերերի Assoesercenti ասոցիացիայի նախնական գնահատմամբ՝ վնասը կարող է կազմել 12,8-24 միլիոն եվրո։ Հրաբխի ժայթքումը խաթարել է օդային հաղորդակցությունը և խնդիրներ առաջացրել զբոսաշրջային հոսքերի համար։

Էտնայի ակտիվության պատճառով Կատանիայի օդանավակայանի աշխատանքը սահմանափակվել է, իսկ դրա փակումը երկարաձգվել է մինչև օգոստոսի 14-ը։ Հրաբխային մոխրի ամպերը ժամանակավորապես ազդել են նաև Մալթայի միջազգային օդանավակայանի աշխատանքի վրա։

Օգոստոսի 8-11-ը Կատանիայի օդանավակայանում չեղարկվել է շուրջ 700 չվերթ, ևս ավելի քան 400 չվերթ վերաուղղորդվել է այլ օդանավակայաններ։

Միաժամանակ, հրաբխագետները դեռևս չեն կարող հստակ կանխատեսել, թե որքան կտևի Եվրոպայի ամենաբարձր գործող հրաբխի ակտիվության ներկայիս փուլը։