Աննորմալ շոգը Ֆրանսիայի տնտեսությանը մինչև 15 մլրդ եվրոյի վնաս կհասցնի

Այս ամռան երկարատև աննորմալ շոգը կարող է Ֆրանսիայի տնտեսության վրա արժենալ 10–15 մլրդ եվրո, ինչը համարժեք է երկրի ՀՆԱ-ի մոտավորապես 0,5%-ին, հայտարարել է Ֆրանսիայի էկոլոգիական անցման նախարար Մոնիկ Բարբյուն, գրում է Politico.

Նրա խոսքով՝ սա դեռ նախնական գնահատական է, որը պետք է ընդունել «մեծ զգուշությամբ»։ Հաշվարկները հիմնված են Ֆրանսիայի ազգային վիճակագրության և տնտեսական հետազոտությունների ինստիտուտի (Insee)՝ նախորդ տարիներին շոգի հետևանքների վերաբերյալ տվյալների վրա։

Վերջնական վնասը կարող է ավելի մեծ լինել, եթե Ֆրանսիայի բազմաթիվ շրջաններում ջերմաստիճանը շարունակի զգալիորեն գերազանցել սեզոնային նորմաները։

Նախնական գնահատմամբ՝ ամենամեծ տնտեսական կորուստները կապված են անտառային հրդեհների և գյուղատնտեսական արտադրության կրճատման հետ։ Հուլիսի կեսերի դրությամբ Ֆրանսիայի տարածքի մոտ 85%-ը գտնվում էր երաշտի նախազգուշացումների տակ։

Կառավարությունում նախազգուշացրել են, որ ծայրահեղ շոգի տնտեսական հետևանքները կուժեղանան, եթե երկրները միջոցներ չձեռնարկեն կլիմայի փոփոխության ազդեցությունը սահմանափակելու համար։

Համեմատության համար՝ 2003 թվականի օգոստոսի ռեկորդային շոգի ժամանակ Ֆրանսիայում հացահատիկային մշակաբույսերի արտադրությունը կրճատվել էր 22%-ով, իսկ գինու արտադրությունը՝ 9%-ով։

Եվրոպական կենտրոնական բանկի՝ 2025 թվականին հրապարակված ուսումնասիրությունը նույնպես ցույց է տվել, որ շոգի ալիքներն ու երաշտները նկատելի բացասական ազդեցություն են ունենում եվրոպական տարածաշրջանների տնտեսական ակտիվության վրա։