Ֆրանսիային չհաջողվեց մինչև 15 տարեկան երեխաների համար սոցիալական ցանցերի արգելք սահմանել

Ֆրանսիայի բարձրագույն սահմանադրական մարմինը Սահմանադրությանը չհամապատասխանող է ճանաչել մինչև 15 տարեկան երեխաների համար սոցիալական ցանցերի արգելքի մասին օրենքը, որը Ֆրանսիայի խորհրդարանը ընդունել էր հուլիսին, իսկ նախագահ Էմանուել Մակրոնը խոստացել էր այն գործարկել արդեն սեպտեմբերից, հաղորդում է BBC-ն։

Սահմանադրական խորհուրդը եկել է այն եզրակացության, որ նոր օրենքը մինչև 15 տարեկան երեխաների համար խոսքի և հաղորդակցության ազատության այնպիսի սահմանափակում է առաջացնում, որը «ո՛չ տեղին է, ո՛չ անհրաժեշտ, ո՛չ էլ համաչափ»։

Ինչպես փոխանցում է AFP գործակալությունը, Սահմանադրական խորհրդի որոշմանն ի պատասխան Ելիսեյան պալատը հայտարարել է, որ նախագահ Մակրոնը վարչապետ Սեբաստիան Լեկոռնյուին հանձնարարել է հնարավորինս շուտ մշակել օրենքի նոր, «իրավաբանորեն հուսալի» նախագիծ։

Հուլիսին թե՛ Սենատի, թե՛ Ֆրանսիայի Ազգային ժողովի ընդունած օրենքով՝ հաջորդ տարվա հունվարից 15 տարին չլրացած անձանց կարգելվեր օգտվել սոցիալական ցանցերից։

Արդեն սեպտեմբերից նոր հաշիվ ստեղծելիս անհրաժեշտ կլիներ հաստատել տարիքը, իսկ հունվարից Ֆրանսիայի յուրաքանչյուր բնակիչ պետք է հաստատեր, որ 15 տարեկանից բարձր է, որպեսզի կարողանար օգտվել սոցիալական ցանցերից։