Իրավաբանը բացատրել է՝ ինչ անել, եթե բանկը գումար է գանձել ուրիշի պարտքի դիմաց

Եթե բանկային քարտն արգելափակվել է կամ հաշվից գումար է գանձվել մեկ այլ անձի նկատմամբ հարուցված կատարողական վարույթի պատճառով, առաջին հերթին անհրաժեշտ է դիմել բանկ և Ռուսաստանի Դատական կարգադրիչների դաշնային ծառայություն (ФССП)՝ պարզելու կատարված գործողությունների հիմքերը։ Այս մասին «Գազետա.Ru»-ին հայտնել է իրավաբան Դմիտրի Խրուլևը։

Նրա խոսքով՝ բանկից պետք է պահանջել կատարողական վարույթի համարը, գումարի չափը, համապատասխան որոշման տվյալները և վարույթն իրականացնող ստորաբաժանման մասին տեղեկությունները։ Դրանից հետո անհրաժեշտ է դիմել ФССП՝ հայտնելով անձի սխալ նույնականացման մասին և կցելով ինքնությունը հաստատող անհրաժեշտ փաստաթղթերը։ Դիմումով պետք է պահանջել ուղղել սխալ տվյալները, վերացնել հաշիվների նկատմամբ սահմանափակումները և պարզել, թե ուր է փոխանցվել արդեն գանձված գումարը։

Իրավաբանը խորհուրդ է տալիս պահպանել բանկային քաղվածքները, ծանուցումները և պետական մարմիններին ներկայացված բոլոր դիմումների ու պատասխանների պատճենները։ Եթե սխալը չի ուղղվում, հնարավոր է բողոք ներկայացնել վերադաս պաշտոնատար անձին կամ դիմել դատարան։ Խրուլևի խոսքով՝ եթե գումարը դեռ գտնվում է Դատական կարգադրիչների դաշնային ծառայության հաշվին, այն վերադարձնելը սովորաբար ավելի արագ է, իսկ եթե արդեն փոխանցվել է պարտատիրոջը, կարող է անհրաժեշտ լինել առանձին վերադարձի պահանջ ներկայացնել։