Կինը բիկինիի հատվածը սափրելուց հետո քիչ է մնացել մահանա

Սաուդյան Արաբիայում 40-ամյա կինը բիկինիի հատվածը սափրելուց և բուսական թրջոց օգտագործելուց հետո վարակվել է ծանր բակտերիալ վարակով, որը սկսել է արագորեն քայքայել փափուկ հյուսվածքները։ Դեպքի մասին հայտնել են Էր Ռիադի Թագավոր Սաուդի համալսարանի բժիշկները՝ American Journal of Case Reports-ում հրապարակված զեկույցում։

Չորս երեխաների մայրը հիվանդանոց է տեղափոխվել ձախ սեռական շրթունքի ուժեղ ցավով և այտուցով, որը տարածվել էր նաև ցայլքի հատվածում։ Նա ունեցել է նաև փսխում և որովայնի ստորին հատվածի ցավեր։ Մոտ մեկ շաբաթ առաջ կինը սափրել էր բիկինիի հատվածը, ապա ժողովրդական բժշկությամբ զբաղվող անձի խորհրդով բուսական թրջոց դրել արտաքին սեռական օրգանների հատվածում։

Բժիշկները նրա մոտ ախտորոշել են Ֆուրնիեի գանգրենա՝ նեկրոտացնող ֆասցիիտի հազվադեպ և կյանքին վտանգ սպառնացող տեսակ, որի դեպքում վարակը կարող է շատ արագ քայքայել շեքի և արտաքին սեռական օրգանների փափուկ հյուսվածքները։ Հետազոտությունները հայտնաբերել են մի քանի տեսակի բակտերիաներ, այդ թվում՝ աղիքային ցուպիկ, կլեբսիելա և էնտերոբակտեր։

Կնոջը շտապ վիրահատել են՝ հեռացնելով ախտահարված հյուսվածքները։ Հետագայում անհրաժեշտ են եղել կրկնակի վիրահատություններ, վակուումային թերապիա և հակաբիոտիկների երկարատև բուժում։ Նա հիվանդանոցում անցկացրել է 77 օր, իսկ վերքերի ամբողջական ապաքինումը գրանցվել է միայն 121-րդ օրը։

Բժիշկները նշում են, որ Ֆուրնիեի գանգրենան տղամարդկանց մոտ հանդիպում է զգալիորեն ավելի հաճախ, սակայն կանանց դեպքում ևս վտանգը չպետք է թերագնահատել։ Հատկապես բարձր ռիսկ կարող է լինել ճարպակալման կամ մաշկի վնասման դեպքում։ Աճուկային հատվածում ուժեղ ցավը, այտուցն ու կարմրությունը մասնագետները համարում են ախտանշաններ, որոնց դեպքում անհրաժեշտ է անհապաղ բժշկական օգնություն ստանալ։