Գիտնականները պլաստիկ թափոնները վառելիքի վերածելու նոր տեխնոլոգիա են մշակել

Նովոսիբիրսկի պետական համալսարանի և Ռուսաստանի գիտությունների ակադեմիայի Սիբիրի բաժանմունքի Կատալիզի ինստիտուտի գիտնականները արտոնագրել են հատուկ կատալիզատորի ստեղծման մեթոդ, որը հնարավորություն է տալիս պլաստիկ թափոնների վերամշակումից ստացված նյութերը վերածել շարժիչային վառելիքի։ Մշակման մասին հայտնում է «ՌԻԱ Նովոստի»-ն՝ հղում անելով համալսարանին։

Նոր տեխնոլոգիան հաջողությամբ փորձարկվել է լաբորատոր պայմաններում և արդեն ներդրման փուլում է «Օնիում պլյուս» ընկերության արտադրությունում։ Գիտնականները մշակել են կատալիզատորների մի ամբողջ խումբ, որոնք, կախված պլաստիկի ջերմային քայքայումից ստացված յուղի բաղադրությունից, կարող են այն վերածել տարբեր տեսակի շարժիչային վառելիքի, այդ թվում՝ ավիացիոն կերոսինի։

Առայժմ կատալիզատորը փորձարկվել է պոլիէթիլենի և պոլիպրոպիլենի խառնուրդից կազմված փորձնական հումքի վրա։ Հաջորդ փուլում գիտնականները պետք է այն հարմարեցնեն իրական պլաստիկ թափոններից ստացված հումքի համար, որի քիմիական բաղադրությունը զգալիորեն ավելի բարդ է։

Նովոսիբիրսկի պետական համալսարանից հայտնել են, որ մշակումը շուկայում անմիջական համարժեքներ չունի և էապես տարբերվում է սովորական նավթային հումքի վերամշակման ժամանակ օգտագործվող կատալիզատորներից։ Ապագայում այն նախատեսվում է արտադրել համալսարանի նոր գիտահետազոտական կենտրոնում ստեղծվող հատուկ փորձարարական լաբորատորիայում։