Բժիշկը զգուշացրել է էժան փաթեթավորված թեյի՝ ոսկորների և հոդերի համար հնարավոր վտանգի մասին

Գաստրոէնտերոլոգ Եվգենի Բելոուսովը զգուշացրել է, որ տարիներ շարունակ մեծ քանակությամբ շատ թունդ և էժան փաթեթավորված թեյ օգտագործելը կարող է բացասաբար ազդել ոսկորների ու հոդերի առողջության վրա։ Այս մասին նա հայտնել է «Լենտա.ռու»-ին։

Բժշկի խոսքով՝ թեյի տերևները ֆտոր են պարունակում, իսկ դրա չափազանց մեծ և երկարատև ընդունումը կարող է նպաստել կմախքային ֆլյուորոզի զարգացմանը։ Սա ոսկորների և հոդերի քրոնիկական հիվանդություն է, որի դեպքում ոսկորները կարող են դառնալ փխրուն, առաջանալ մարմնի կարկամություն, շարժունակության սահմանափակում և մկանային ջղաձգումներ։ Բելոուսովի խոսքով՝ ֆտորի առավել մեծ քանակ կարող է պարունակվել էժան սև կամ կանաչ փաթեթավորված թեյերում, որոնց արտադրության համար օգտագործվում են ավելի հին տերևներ։

Միաժամանակ բժիշկն ընդգծել է, որ չափավոր օգտագործման դեպքում՝ օրական մոտ 2–4 բաժակ, թեյը սովորաբար չի վնասում։ Ընդհակառակը՝ դրա մեջ պարունակվող պոլիֆենոլներն ու կատեխինները կարող են օգտակար լինել։ Մասնագետի խոսքով՝ հիմնական վտանգը կապված է այն դեպքերի հետ, երբ մարդը տարիներ շարունակ մեծ քանակությամբ շատ թունդ թեյ է խմում՝ միաժամանակ սննդակարգում ունենալով կալցիումի և սպիտակուցի պակաս։