Եվրոպան ավելացրել է ռուսական գազի գնումները

Եվրոպական երկրներն ավելացրել են ռուսական խողովակաշարային գազի ներմուծումը՝ միաժամանակ կրճատելով համաշխարհային շուկայից հեղուկացված բնական գազի (ՀԲԳ) գնումները։ Այս մասին հայտնում է «ՌԻԱ Նովոստի»-ն՝ հղում անելով վիճակագրական տվյալներին։

Օգոստոսի 1-12-ը ռուսական խողովակաշարային գազի մատակարարումները բուլղարա-թուրքական սահմանին գտնվող «Ստրանջա-2 — Մալքոչլար» կետով նախորդ ամսվա նույն ժամանակահատվածի համեմատ աճել են 7 տոկոսով, իսկ տարեկան կտրվածքով՝ 5 տոկոսով՝ հասնելով 609,2 մլն խորանարդ մետրի։ Այսպիսով, «Թուրքական հոսք» գազատարով մատակարարումների ծավալը հասել է 2026 թվականի մարտից ի վեր ամենաբարձր մակարդակին։

Միևնույն ժամանակ, օգոստոսի նույն ժամանակահատվածում ՀԲԳ տերմինալներից Եվրամիության գազատրանսպորտային համակարգ է մատակարարվել 3,2 մլրդ խորանարդ մետր գազ՝ ամսական կտրվածքով 3,7 տոկոսով, իսկ տարեկան կտրվածքով՝ 12,6 տոկոսով պակաս։

Ավելի վաղ հաղորդվել էր, որ Եվրոպայի գազապահեստարանները լցված են ընդամենը 59 տոկոսով, ինչը 2009 թվականից ի վեր տարվա այս ժամանակահատվածի համար ամենացածր ցուցանիշն է։ Մատակարարման պակասի պահպանման դեպքում Եվրոպան կարող է ձմռանը բախվել գազի ավելի բարձր գների։