Ուկրաինական կիբերհարձակման հետևանքով Wildberries-ում խոշոր խափանումներ են գրանցվել

Ուկրաինայի ռազմական հետախուզությունը հայտնել է, որ օգոստոսի 10-11-ին Cyber Corps խմբի իրականացրած կիբերգործողության հետևանքով ռուսական Wildberries առցանց հարթակի աշխատանքում լայնածավալ խափանումներ են առաջացել։

Հարձակման հետևանքով խնդիրներ են առաջացել հաճախորդների սպասարկման հեռավար համակարգերում, մասամբ խաթարվել է վճարային ենթակառուցվածքի աշխատանքը, իսկ կոնտակտ-կենտրոնների ծանրաբեռնվածությունը զգալիորեն աճել է։ Օգտատերերը զանգվածաբար հայտնել են վճարումների հետ կապված խնդիրների մասին։

Ուկրաինական հետախուզության գնահատմամբ՝ գործողությունն ուղղված է եղել Ռուսաստանի խոշորագույն առցանց առևտրային հարթակներից մեկի թվային ենթակառուցվածքի դեմ։