Playboy-ի հիմնադիրը Էփշտեյնի դեմ բողոքել է ՀԴԲ-ին

Playboy ամսագրի հիմնադիր Հյու Հեֆները 2005 թվականին բազմիցս դիմել է ԱՄՆ Հետաքննությունների դաշնային բյուրոյին՝ ֆինանսիստ Ջեֆրի Էփշտեյնի կողմից ամսագրի մոդելներից մեկի նկատմամբ ենթադրյալ սեռական բռնության մասին տեղեկություններ հաղորդելու համար։ Այս մասին, հղում անելով դատական փաստաթղթերին, գրում է The New York Post-ը։

Փաստաթղթերի համաձայն՝ Playboy-ի «Միսս հոկտեմբեր 2003» տիտղոսը ստացած Օդրա Լին Քրիստիանսենն անձամբ Հեֆներին պատմել է Էփշտեյնի գործողությունների մասին։ Նրա պնդմամբ՝ դեպքերի ժամանակ ինքը 23 տարեկան էր և բնակվում էր Էփշտեյնի Բևեռլի Հիլզի առանձնատանը։ Կինը նաև պնդել է, որ Էփշտեյնն իրեն սեռական շահագործման նպատակով փոխանցել է Մակաոյի միլիարդատեր և խաղատների սեփականատեր Սթենլի Հոյին։

Էփշտեյնի ենթադրյալ 32 զոհերի շահերը ներկայացնող փաստաբան Ջորդան Մերսոնը ՀԴԲ-ին մեղադրել է ֆինանսիստի հանցագործությունների մասին տեղեկությունները լռության մատնելու փորձի մեջ։ Միաժամանակ The New York Post-ը հիշեցնում է, որ 2017 թվականին մահացած Հեֆներն ինքը հետմահու մեղադրվել է սեռական բռնության մեջ․ 2022 թվականի «Playboy-ի գաղտնիքները» վավերագրական նախագծում մի շարք նախկին մոդելներ ծանր մեղադրանքներ էին հնչեցրել նրա հասցեին։