ՌԴ ԱԳՆ-ն ԱՄՆ-ից և Թուրքիայից պարզաբանում է պահանջել Ուկրաինային զենք մատակարարելու հարցով

Ռուսաստանի արտաքին գործերի նախարարությունը ԱՄՆ-ից և Թուրքիայից պարզաբանումներ է պահանջել Ուկրաինային զենք մատակարարելու ծրագրերի վերաբերյալ։ Այս մասին «Лента.ру»-ին հայտնել է ՌԴ ԱԳՆ պաշտոնական ներկայացուցիչ Մարիա Զախարովան։

Նրա խոսքով՝ ԱՄՆ Կոնգրեսի հրապարակած փաստաթղթերում նշվում է Ուկրաինային սպառազինության խոշոր խմբաքանակ փոխանցելու մասին։ Խոսքը, մասնավորապես, համազարկային կրակի ռեակտիվ համակարգերի 12 կայանքի, դրանց համար ավելի քան 2,5 հազար չկառավարվող կասետային զինամթերքի, 203 մմ տրամաչափի 47 հազար կասետային հրետանային արկի և 70 ATACMS օպերատիվ-մարտավարական հրթիռի մասին է։

Զախարովան նշել է, որ առայժմ պարզ չէ, թե ով է նախաձեռնել սպառազինության վերաարտահանումը և ինչպես է նախատեսվում այն տեղափոխել Ուկրաինա։ Նրա գնահատմամբ՝ նման մատակարարումները կարող են վնաս հասցնել Մոսկվայի հարաբերություններին ինչպես Վաշինգտոնի, այնպես էլ Անկարայի հետ։