Հարավային Կորեան այս տարի առաջին անգամ նախազգուշական կրակ է բացել սահմանը խախտած ԿԺԴՀ զինվորականների ուղղությամբ

Հարավկորեական զինվորականները անցած շաբաթ նախազգուշական կրակ են բացել այն բանից հետո, երբ հյուսիսկորեացի զինվորների մի խումբ հատել է երկու երկրները բաժանող ռազմական դեմարկացիոն գիծը (MDL), հայտնում է Yonhap-ը։

Կրակոցներից հետո ԿԺԴՀ զինծառայողները վերադարձել են իրենց կողմ, կիրակի հայտնել է Հարավային Կորեայի կառավարության աղբյուրը։

Ըստ աղբյուրի, մի քանի հյուսիսկորեացի զինվորականներ հատել են սահմանային գոտու արևելյան հատվածում գտնվող գիծը։ Ենթադրաբար, նրանք պարեկություն էին իրականացնում տարածքում և պատահմամբ անցել էին դեմարկացիոն գծից այն կողմ։

Սա այս տարվա առաջին դեպքն է, երբ հարավկորեական զինվորականները նախազգուշական կրակ են կիրառել՝ ի պատասխան ԿԺԴՀ-ի կողմից սահմանի խախտման։ Մինչև այդ 2026 թվականին նմանատիպ միջադեպեր չէին գրանցվել։

Ուժի կիրառման գործող կանոնների համաձայն, եթե հյուսիսկորեացի զինծառայողները մոտենում են դեմարկացիոն գծին, Հարավային Կորեան նախ նախազգուշացում է փոխանցում բարձրախոսներով։ Այն հատելու դեպքում զինվորականները նախազգուշական կրակ են բացում։

Վերջին տարիներին հյուսիսկորեացի զինվորականների կողմից դեմարկացիոն գծի կարճատև խախտումները պարբերաբար են տեղի ունենում։ ԿԺԴՀ-ն ամրապնդում է իր դիրքերը սահմանի երկայնքով այն բանից հետո, երբ երկրի առաջնորդ Կիմ Չեն Ընը 2023 թվականի վերջին հայտարարել էր, որ Հարավային Կորեայի հետ հարաբերությունները պետք է դիտարկել որպես «երկու թշնամական պետությունների» հարաբերություններ։

2025 թվականին հյուսիսկորեացի զինվորականները 17 անգամ խախտել են ռազմական դեմարկացիոն գիծը։