Ուկրաինայի պաշտպանության նախարարություն․ ՌԴ-ում Wildberries-ի տասը խոշորագույն լոգիստիկ կենտրոններից յոթը շարքից դուրս են բերվել

Ռուսաստանում Wildberries-ի տասը խոշորագույն լոգիստիկ կենտրոններից յոթը, ուկրաինական պաշտպանության նախարարության տվյալներով, այժմ չեն գործում հարձակումների հետևանքների պատճառով։

Ինչպես հայտնում է РБК-Украина-ն՝ հղում անելով Ուկրաինայի պաշտպանության նախարարությանը, մարքեթփլեյսի վերջին խոշոր օբյեկտներից մեկը շարքից դուրս է եկել օգոստոսի 16-ի գիշերը Մոսկվայի մարզի վրա անօդաչու թռչող սարքերի լայնածավալ հարձակումից հետո։

Խոսքը վերաբերում է Դոմոդեդովոյի շրջանի «Կոլեդինո» ինդուստրիալ պարկում գտնվող Wildberries-ի լոգիստիկ համալիրին։ Դրա տարածքը կազմում էր մոտ 250 հազար քառակուսի մետր, ինչը այն դարձնում էր ընկերության ամենամեծ պահեստը Ռուսաստանում։ Հարձակումից հետո օբյեկտի տարածքում խոշոր հրդեհ է տեղի ունեցել։

Ուկրաինայի պաշտպանության նախարարությունը պնդում է, որ հարվածների հետևանքով Wildberries-ի խոշորագույն լոգիստիկ հզորությունների զգալի մասը շարքից դուրս է բերվել։

Ավելի վաղ՝ օգոստոսի 14-ին, ուկրաինացի զինվորականները հայտարարել էին Մոսկվայից մոտ 150 կիլոմետր հեռավորության վրա գտնվող Wildberries-ի խոշոր պահեստին հասցված հարվածի մասին։ Դրանից առաջ արբանյակային լուսանկարները ցույց էին տվել Բաշկորտոստանում ընկերության օբյեկտին հասցված հարվածի հետևանքները․ հրդեհը ոչնչացրել էր շենքի մոտ 30 հազար քառակուսի մետր տարածք։