ԱՄՆ-Իրան հակամարտությունը տեղափոխվում է տնտեսական դաշտ․ Զաքարյան

ՀՀ ՊՆ նախկին փոխնախարար Արտակ Զաքարյանի գնահատմամբ՝ ԱՄՆ-ի և Իրանի միջև ռազմական հակամարտությունն աստիճանաբար տեղափոխվում է նաև տնտեսական դաշտ։

Նա նշում է, որ Հորմուզի նեղուցի շրջափակումը Իրանի համար ավելի ծանր հետևանքներ կարող է ունենալ, քան սովորական պատժամիջոցները, քանի որ երկրի նավթի արտահանման հիմնական մասը իրականացվում է հենց այդ ուղղությամբ։ Զաքարյանի խոսքով՝ նավթի արտահանումը վերջին շաբաթներին կտրուկ նվազել է, իսկ օգոստոսի սկզբին գրեթե կանգ է առել։

Ըստ տարբեր գնահատականների՝ շրջափակման հետևանքով Իրանը կարող է օրական կորցնել 200-435 միլիոն դոլար։ Միաժամանակ նավթի արդյունահանումը շարունակվում է, սակայն դրա իրացման հնարավորությունները սահմանափակվել են։

Զաքարյանը կարծում է, որ եթե շրջափակումը երկարատև բնույթ ստանա, այն կարող է էապես թուլացնել Իրանի տնտեսությունը և խորացնել երկրի ներքին խնդիրները։

«ԱՄՆ-Իրան ռազմական բախումները տեղափոխվում են տնտեսական դաշտ, և հենց այդտեղ կարող են վերածվել ձգձգվող հակամարտության», - գրել է նա։