ԱԹՍ-ների զանգվածային գրոհ Մոսկվայի վրա․ տուժածներ, հրդեհ և օդանավակայանների աշխատանքի խափանում

Օգոստոսի 18-ի գիշերը Մոսկվան և Մոսկվայի մարզը ենթարկվել են անօդաչու թռչող սարքերի զանգվածային հարձակման։ Այս մասին հայտնել է Մոսկվայի մարզի նահանգապետ Անդրեյ Վորոբյովը։

Նախնական տվյալներով՝ Մոսկվայի մարզում տուժել է առնվազն երեք մարդ, այդ թվում՝ 10-ամյա մի աղջիկ։ Վնասներ են կրել բնակելի և կոմերցիոն շինություններ, ավտոմեքենաներ, ինչպես նաև էներգետիկ ենթակառուցվածքներ։

Լրատվամիջոցների փոխանցմամբ՝ Բոգորոդսկի շրջանում բժշկական օգնության կարիք է ունեցել մի կին, որը վնասվածքներ է ստացել ԱԹՍ-ի բեկորների ընկնելու հետևանքով։

Անօդաչուներից մեկը հարվածել է նաև «Wildberries»-ի պահեստային համալիրին՝ «Ատլանտ-պարկ» տարածքում։ Դեպքի վայրում հրդեհ է բռնկվել, որը փրկարարներին հաջողվել է արագ տեղայնացնել։ Նախնական տեղեկություններով՝ պահեստային համալիրում տուժածներ չկան։

Կոլոմնայում վնասվածքներ է ստացել 27-ամյա տղամարդ։ Մի շարք այլ շրջաններում ևս արձանագրվել են ավերածություններ։

Հարձակումը ազդեցություն է ունեցել նաև Մոսկվայի վրա։ Քաղաքապետ Սերգեյ Սոբյանինը գիշերվա ընթացքում մի քանի անգամ հայտնել է մայրաքաղաքի ուղղությամբ թռչող անօդաչուների խոցման մասին։ Նրա տվյալներով՝ ժամը 04:08-ի դրությամբ Մոսկվայի մատույցներում ոչնչացվել է 73 անօդաչու թռչող սարք։

Անվտանգության նկատառումներից ելնելով՝ ժամանակավոր սահմանափակումներ են կիրառվել Մոսկվայի ավիահանգույցում։ Սահմանափակումները վերաբերվել են «Վնուկովո», «Դոմոդեդովո», «Ժուկովսկի» և «Շերեմետևո» օդանավակայաններին, ինչի հետևանքով արձանագրվել են չվերթների ուշացումներ և որոշ երթուղիների փոփոխություններ։