Ռուսական արմատներով ամերիկացի գործարարը՝ «Թրամփի ուղու» առանցքում․ ո՞վ է նա

Deutsche Welle-ն անդրադարձել է ամերիկացի ներդրող Կոնստանտին Սոկոլովին, որը նշանակվել է TRIPP+ ներդրումային հիմնադրամի ղեկավար։ Հիմնադրամը նախատեսում է ավելի քան 200 մլն դոլարի մեկնարկային կապիտալով ներդրումներ իրականացնել տարածաշրջանի ռազմավարական ենթակառուցվածքներում։

Սոկոլովը ծնվել է Սանկտ Պետերբուրգում, 21 տարեկանում տեղափոխվել է ԱՄՆ, իսկ հետագայում Չիկագոյում հիմնել IJS Investments ներդրումային ընկերությունը։ Վերջին տարիներին նա ակտիվորեն ընդլայնել է իր ներկայությունը Հայաստանում՝ ձեռք բերելով խոշոր ակտիվներ հեռահաղորդակցության և հանքարդյունաբերության ոլորտներում։

Նրա անունը կապվում է նաև «Վիվա-Արմենիայի» և «Ռոստելեկոմի» հայկական ակտիվների ձեռքբերման հետ։ DW-ն առանձնացնում է նաև Թեղուտի պղնձամոլիբդենային հանքավայրի գործարքը, որը, ըստ հրապարակման, իրականացվել է մի քանի ընկերությունների միջոցով։

Միաժամանակ Սոկոլովը հայտնի է ԱՄՆ Հանրապետական կուսակցության և Դոնալդ Թրամփի աջակից լինելու հանգամանքով։ Associated Press-ի տվյալներով՝ նա շուրջ 11 մլն դոլար է նվիրաբերել MAGA շարժմանը։

Նրա նշանակումն ու Հայաստանում ակտիվների ձեռքբերումը տարբեր գնահատականների են արժանացել։ Որոշ փորձագետներ Սոկոլովի ռուսական ծագումը դիտարկում են որպես հնարավոր քաղաքական գործոն, իսկ մյուսները կարծում են, որ նրա ընտրությունը պայմանավորված է տարածաշրջանի և նախկին ԽՍՀՄ երկրների բիզնես միջավայրի վերաբերյալ ունեցած փորձով։

TRIPP+ հիմնադրամը նախատեսված է Հարավային Կովկասում և Կենտրոնական Ասիայում ներդրումներ կատարելու համար և դիտարկվում է որպես տարածաշրջանային հաղորդակցությունների զարգացման ամերիկյան ռազմավարության մաս։