«Առյուծի միգամածությունը». տիեզերական աստղադիտակը նոր պատկերներ է ստացել NGC 2392 մոլորակային միգամածությունից

NASA-ի «Ջեյմս Ուեբ» տիեզերական աստղադիտակը նոր, բարձր հստակությամբ պատկերներ է ստացել NGC 2392 մոլորակային միգամածությունից, որը հայտնի է «Առյուծի միգամածություն» անվամբ։ Այն իր ձևով հիշեցնում է առյուծի դեմք՝ ընդգծված «բաշով»։

Միգամածությունը նախկինում՝ 2000 թվականին, լուսանկարել էր «Հաբլ» աստղադիտակը։ Սակայն «Ուեբի» ինֆրակարմիր դիտարկումները հնարավորություն են տվել շատ ավելի մանրամասն տեսնել դրա կառուցվածքը՝ ներառյալ փոշու խիտ կուտակումներն ու իոնացված գազի մշուշը։

«Առյուծի» կենտրոնում գտնվում է մահացող աստղի մնացորդը՝ չափազանց տաք սպիտակ թզուկը։ Աստղի կյանքի վերջին փուլում այն դուրս է նետել իր արտաքին շերտերը, որոնք վերածվել են գազի և փոշու հսկայական ամպի։ Կենտրոնական աստղի ճառագայթումը շարունակում է փոխել այդ նյութը՝ ձևավորելով միգամածության բարդ օղակներն ու թաղանթները։

NASA-ի տվյալներով՝ «Առյուծի բաշը» իրականում փոշու թաղանթի ներքին հատվածն է, իսկ մազերի նմանվող երկարավուն գոյացությունները փոշու խիտ կուտակումներ են, որոնք կարողացել են դիմակայել կենտրոնական սպիտակ թզուկի ինտենսիվ ճառագայթմանը։

Միգամածությունը դեռ շարունակում է ընդարձակվել և փոփոխվել։ Աստղագետների գնահատմամբ՝ մոտ 10 հազար տարի անց NGC 2392-ը աստիճանաբար կցրվի։