Ռուսաստանում առաջարկել են էներգետիկ ըմպելիքների վրա առողջության համար վտանգի մասին նախազգուշացում տեղադրել

Ռուսաստանում առաջարկել են էներգետիկ ըմպելիքների փաթեթավորման վրա պարտադիր նախազգուշացում տեղադրել՝ ալկոհոլային խմիչքների օրինակով։ Նման առաջարկով հանդես է եկել ՌԴ Պետդումայի առողջապահության կոմիտեի փոխնախագահ Ալեքսեյ Կուրիննին, գրում է «Լենտա.ռու»-ն։

Պատգամավորի խոսքով՝ մեծ քանակությամբ էներգետիկ ըմպելիքների օգտագործումը կարող է վնասակար լինել շաքարի բարձր պարունակության պատճառով, իսկ դրանցում առկա մեծ քանակությամբ կոֆեինն ու տաուրինը բարձրացնում են նյարդային համակարգի գրգռվածությունը և լրացուցիչ ծանրաբեռնվածություն ստեղծում սրտի ու ենթաստամոքսային գեղձի համար։ Նա նշել է, որ հատկապես երիտասարդների շրջանում տարածված է օրական մի քանի տարա էներգետիկ ըմպելիք օգտագործելը, մինչդեռ առողջական հետևանքները կարող են ի հայտ գալ ավելի ուշ։

Կուրիննին առաջարկել է տարաների դիմային հատվածում խոշոր և տեսանելի տառերով պարտադիր նշել՝ «Այս ըմպելիքի օգտագործումը կարող է վտանգավոր լինել ձեր առողջության համար»։ Առաջարկը հնչել է այն բանից հետո, երբ Բելառուսում հանգստացող 25-ամյա ռուսաստանցի կինը էներգետիկ ըմպելիքների չափից ավելի օգտագործման հետևանքով ծանր առիթմիայով հոսպիտալացվել էր․ նրա սրտի զարկերի հաճախականությունը հասել էր րոպեում 210-ի։