Բացահայտվել է Եգիպտոսի Բեկյալ բուրգի մոտ գտնվող խորհրդավոր կառույցների հնարավոր նշանակությունը

Եգիպտոսի Բեկյալ բուրգի հարևանությամբ գտնվող հսկայական քարե կառույցները, որոնք տասնամյակներ շարունակ տարակարծությունների պատճառ էին դարձել հնագետների շրջանում, կարող էին հնագույն հիդրոտեխնիկական համակարգի մաս լինել։ Այս մասին գրում է ՌԻԱ Նովոստին՝ ներկայացնելով ֆրանսիացի և եգիպտացի հետազոտողների ուսումնասիրությունը։

Գիտնականներ Քսավյե Լանդրոն, Գիյոմ Պիտոնը և Սաիդ Համեդը պատմական քարտեզների, բրիտանական ռազմաօդային ուժերի հին լուսանկարների, արբանյակային տվյալների ու երկրաբանական սկանավորման արդյունքների ուսումնասիրությունից հետո ենթադրել են, որ մոտ մեկ կիլոմետր երկարությամբ երկու քարե թմբերը կարող էին կազմել բազմաստիճան ամբարտակ։ Համակարգը նախատեսված էր ջրի հոսքը վերահսկելու, հեղեղումների ուժը նվազեցնելու և ջուր կուտակելու համար։ Հետազոտողները հայտնաբերել են նաև մոտ մեկ կիլոմետր երկարությամբ շրջանցիկ ջրանցքի հետքեր, որը հնարավոր է օգտագործվել է շինանյութերի տեղափոխման և աշխատողներին անհրաժեշտ պաշարների մատակարարման համար։

Այսօր տարածքը գրեթե ամբողջությամբ անապատ է, սակայն ուսումնասիրությունները ցույց են տալիս, որ հազարավոր տարիներ առաջ տարածաշրջանում տեղումները զգալիորեն ավելի առատ էին։ Հետազոտողների հաշվարկներով՝ այդ պայմաններում հնարավոր էին մինչև 50 հազար խորանարդ մետր ծավալով հեղեղումներ, ինչը բավարար կլիներ ջրամբարը լցնելու համար։ Պեղումները դեռ շարունակվում են, ուստի գիտնականների վարկածը վերջնականապես հաստատված չէ։