Discord հարթակը 13-ամյա աղջկա մահից հետո դադարեցրել է ուղիղ հեռարձակումները

Discord հարթակը Բրազիլիայում ժամանակավորապես դադարեցրել է ուղիղ հեռարձակումների գործառույթը, քանի որ իշխանությունները քննադատել էին ընկերությանը՝ երեխաների և դեռահասների պաշտպանությունը պատշաճ կերպով չապահովելու համար: Այս որոշումը կայացվել է 13-ամյա աղջկա հետ տեղի ունեցած դեպքից հետո․ ըստ տեղեկությունների՝ այլ օգտատերեր ուղիղ հեռարձակման ընթացքում նրան դրդել են ինքնասպանության, հայտնում է CBS News-ը:

Որոշումն ընդունվել է այն բանից հետո, երբ Բրազիլիայի Տվյալների պաշտպանության ազգային վարչությունն անցյալ շաբաթ պահանջել էր կասեցնել ուղիղ հեռարձակումների հնարավորությունը: Discord-ում հայտարարել են, որ ընկերությունը բանակցում է իշխանությունների հետ՝ այնպիսի լուծում գտնելու նպատակով, որը թույլ կտա երկրի օգտատերերի համար վերականգնել այդ գործառույթը:

«Մենք նախկինի պես հանձնառու ենք Բրազիլիայի պետական մարմինների ներկայացուցիչների հետ համագործակցությանը, որպեսզի համացանցային միջավայրը՝ ինչպես Discord-ում, այնպես էլ առհասարակ, ավելի անվտանգ դարձնենք բոլոր օգտատերերի համար», — հայտարարել են ընկերությունում:

Բրազիլիայի իշխանությունների տվյալներով՝ հուլիսին Մատու Գրոսու դու Սուլ նահանգում մի անչափահաս աղջիկ ենթարկվել է այլ օգտատերերի ազդեցությանը, որոնք ուղիղ հեռարձակման ընթացքում նրան դրդել են ինքնասպանության: Նրա մահվան գործով հինգ դեռահաս է ձերբակալվել:

Բրազիլիայի առաջին տիկին Ռոզանժելա Լուլա դա Սիլվան (հայտնի է որպես Ժանժա) օգոստոսի 6-ին կոչ է արել երկրում ամբողջությամբ արգելափակել Discord-ը: «Ես չեմ կարող հանդուրժել, որ 13-ամյա աղջիկը համացանցում՝ Discord-ի ուղիղ եթերում, ինքնավնասում հասցնի իրեն, կախվի ու մահանա», — ասել է նա:

Բրազիլիայի Տվյալների պաշտպանության ազգային վարչությունը հայտարարել է, որ հարթակում ուղիղ հեռարձակումները բազմիցս օգտագործվել են բռնություն, բուլինգ, ինչպես նաև ինքնավնասում և ինքնասպանություն հրահրող բովանդակություն տարածելու համար: Գերատեսչության գնահատմամբ՝ Discord-ը բավարար միջոցներ չի ձեռնարկել, որպեսզի երեխաները և դեռահասները չկարողանան մուտք գործել նմանատիպ բովանդակությանը, որը լուրջ սպառնալիք է ներկայացնում նրանց անվտանգությանը:

Միևնույն ժամանակ, Discord-ը հերքել է պնդումը, թե աղջկա մահը ցուցադրվել է ուղիղ եթերում: Ընկերությունը հայտնել է, որ ուսումնասիրել է այն մասնավոր սերվերի գործունեությունը, որտեղ հանցավոր տարրերի հետ կապված օգտատերերը, ենթադրաբար, մարդկանց դրդել են ինքնավնասման, և այն փակել է դեռևս աղջկա մահվանից առաջ:

Համացանցում մարդու իրավունքների պաշտպանությամբ զբաղվող SaferNet Brazil կազմակերպության տվյալներով՝ հունվարից հուլիս ընկած ժամանակահատվածում Բրազիլիայում Discord-ի վերաբերյալ բողոքների թիվն աճել է 54%-ով (նախորդ տարվա նույն ժամանակահատվածի համեմատ): Կազմակերպության նախագահ Տյագո Տավարեսը հայտարարել է, որ 13-ամյա աղջկա մահը «առանձնացված դեպք չէ», այլ այն խնդրի հետևանքը, որը կազմակերպությունն արձանագրում է արդեն մի քանի տարի:

Այդուհանդերձ, տեխնոլոգիական ոլորտի ներկայացուցիչները քննադատել են իշխանությունների որոշումը: Sage Networks ընկերության տեխնոլոգիաների գծով տնօրեն Տյագո Այուբի կարծիքով՝ գործառույթի արգելափակումը կարող է հանգեցնել նրան, որ հարթակը հանցավոր նպատակներով օգտագործողները պարզապես կտեղափոխվեն այլ ծառայություններ, որտեղ նրանց գործունեությունը վերահսկելն ավելի դժվար կլինի:

Բրազիլիայում տեղի ունեցած դեպքը դարձել է համացանցում երեխաների անվտանգության վերաբերյալ ավելի լայն քննարկման մաս: Ավելի վաղ երկիրն ընդունել է անչափահասների պաշտպանությունն ուժեղացնող օրենք․ 16 տարեկանից ցածր օգտատերերը պետք է սոցիալական ցանցերի իրենց հաշիվները կապեն օրինական ներկայացուցչի օգտահաշվի հետ, իսկ թվային հարթակները պարտավոր են ներդնել տարիքի ստուգման արդյունավետ համակարգեր:

Նմանատիպ միջոցներ են ձեռնարկում նաև այլ երկրներ: Ավստրալիան 2025 թվականի դեկտեմբերին առաջինն արգելեց 16 տարեկանից ցածր երեխաներին սոցիալական ցանցերից օգտվելը: Մեծ Բրիտանիան հայտարարեց նմանօրինակ սահմանափակումներ մտցնելու ծրագրերի մասին․ ընդ որում՝ վարչապետ Քիր Սթարմերն առաջարկեց դրանք տարածել նաև ուղիղ հեռարձակումների գործառույթների և անծանոթների հետ երեխաների շփման վրա:

Նույն օրը Ֆիլիպինների իշխանությունները հայտնեցին համացանցում բռնության հեռարձակման հետ կապված մեկ այլ միջադեպի մասին: Իշխանությունների տվյալներով՝ Զամբոանգա քաղաքի մասնավոր կաթոլիկ դպրոցի իններորդ դասարանցին ուղիղ եթերում ցուցադրել է դասընկերոջ վրա հարձակումը, սպանել նրան, ապա ինքնասպան եղել:

Ֆիլիպինների ներքին գործերի նախարար Վիկտոր Ռեմուլյան հաստատել է, որ ենթադրյալ հարձակվողը սոցիալական ցանցերում հեռարձակել է միջադեպը: Ավելի ուշ նրա էջը Facebook-ում արգելափակվել է: