Մոսկվան հույս ունի Բաքվի հետ երկխոսություն ծավալել Ռուսաստանի դեմ ուղղված ոչ բարեկամական թեզերի շուրջ․ Զախարովա

ՌԴ ԱԳՆ պաշտոնական ներկայացուցիչ Մարիա Զախարովան հայտարարել է, որ Ադրբեջանի իշխանությունների կողմից միջազգային հետախուզում հայտարարված ՌԴ քաղաքացիներ Իվան Կնյազևի, Սեմյոն Ուրալովի և Ալեքսեյ Չադաևի հայտարարությունները չեն արտացոլում Բաքվի վերաբերյալ Մոսկվայի պաշտոնական դիրքորոշումը։

«Նշված մասնավոր անձանց հայտարարությունները որևէ կերպ չեն արտացոլում Ադրբեջանին և այդ Հանրապետության հետ հարաբերություններին ուղղված Մոսկվայի մոտեցումները»,- այս մասին ասել է Զախարովան։

Նա ընդգծել է, որ ռուս-ադրբեջանական հարաբերությունները, Մոսկվայի կարծիքով, պետք է զարգանան գործող երկկողմ պայմանագրիրավական բազայի, առաջին հերթին՝ 2022 թվականի փետրվարի 22-ին Մոսկվայում ստորագրված Դաշնակցային փոխգործակցության մասին հռչակագրի հիման վրա։

Զախարովան նաև նշել է, որ Ռուսաստանը պատրաստ է պաշտպանել իր քաղաքացիների օրինական շահերն ու իրավունքները, եթե Ադրբեջանի գլխավոր դատախազության կողմից նրանց նկատմամբ միջազգային հետախուզում հայտարարվի։

Միևնույն ժամանակ, ՌԴ ԱԳՆ ներկայացուցիչը նշել է Ադրբեջանի տեղեկատվական դաշտում Ռուսաստանի հանդեպ ոչ բարեկամական թեզերի առկայությունը։

«Ադրբեջանցի գործընկերներին բազմիցս առաջարկել ենք հանգիստ պայմաններում՝ առանց քաղաքականացման ու մեդիա աղմուկի, ոլորտային խորհրդակցությունների միջոցով քննարկել տեղեկատվական դաշտի առողջացման հարցերը»,- նշել է Զախարովան՝ հույս հայտնելով, որ կողմերի միջև նման երկխոսություն կկայանա։

Ավելի վաղ Ադրբեջանի գլխավոր դատախազությունը Ինտերպոլի միջոցով հետախուզում էր հայտարարել Ռուսաստանի երեք քաղաքացիների նկատմամբ՝ «ահաբեկչության կոչերի» մեղադրանքով։