Ռուսաստանում թվային ռուբլով բոլոր գործարքները քաղաքացիների համար անվճար կլինեն

Սեպտեմբերի 1-ից Ռուսաստանի քաղաքացիները թվային ռուբլով գործարքների համար միջնորդավճար չեն վճարի։ Այս մասին հայտնել է ՌԴ Կենտրոնական բանկի ազգային վճարային համակարգի դեպարտամենտի տնօրեն Ալլա Բակինան։

Նույն օրվանից քաղաքացիները կկարողանան թվային ռուբլու դրամապանակ բացել համակարգային նշանակություն ունեցող բանկերի հավելվածների միջոցով։ Թվային ռուբլին կգործի կանխիկ և անկանխիկ ռուբլու հետ զուգահեռ և չի փոխարինի դրանց։

Սեպտեմբերից թվային ռուբլով վճարումներ կընդունեն նաև տարեկան ավելի քան 120 մլն ռուբլի շրջանառություն ունեցող առևտրային ցանցերը։ Գնում կատարելիս անհրաժեշտ կլինի բանկային հավելվածով սկանավորել QR կոդը, ընտրել թվային ռուբլին և հաստատել վճարումը։