Ղրղզստանը պատժամիջոցներից խուսափելու համար կփակի 19 ընկերություն

Ղրղզստանի իշխանությունները որոշել են հարկադիր լուծարել 19 ընկերություն՝ միջազգային պատժամիջոցների տակ հայտնվելու ռիսկը նվազեցնելու համար։ Kaktus Media-ի տվյալներով՝ ավելի վաղ Բիշքեկը կազմել էր պատժամիջոցային ռիսկեր պարունակող գործունեություն իրականացնող 40 ընկերությունների ցանկ։

Ստուգումների արդյունքում որոշվել է փակել ևս 19 ձեռնարկություն։ Այս քայլով Ղրղզստանը փորձում է խուսափել Ռուսաստանի դեմ սահմանված պատժամիջոցները շրջանցելուն աջակցելու վերաբերյալ մեղադրանքներից։ Թե կոնկրետ որ ընկերությունների մասին է խոսքը, չի նշվում։

Ավելի վաղ Բիշքեկը հայտարարել էր, որ չի օգնում շրջանցել միջազգային պատժամիջոցները, սակայն չի պատրաստվում նաև դադարեցնել առևտուրը Ռուսաստանի հետ։ Միաժամանակ երկիրը խստացրել է բանկային գործարքների, երկակի նշանակության ապրանքների արտահանման և ընկերությունների գործունեության վերահսկողությունը։