Էստոնիայում տղամարդը դատարանով չեղարկել է «Russia» գրությամբ շորտերի համար նշանակված տուգանքը

Էստոնիայի բնակիչ Վլադիմիր Բաշկիրովը դատարանի միջոցով կարողացել է չեղարկել «Russia» գրությամբ շորտեր կրելու համար իրեն նշանակված տուգանքը, հայտնում է Postimees-ը։

Վիրուի շրջանային դատարանը կարճել է գործը՝ իրավախախտման կազմի բացակայության հիմքով։ Ոստիկանությունը ևս վերանայել է գործի հանգամանքները և համաձայնել, որ տղամարդը նպատակ չի ունեցել հրապարակայնորեն ցուցադրել արգելված խորհրդանիշներ։ Դատարանի որոշումն ուժի մեջ մտնելուց հետո ոստիկանությունը պարտավոր է վերադարձնել նաև առգրավված շորտերը։

Էստոնիայում 2022 թվականից արգելված է թշնամական համարվող խորհրդանիշների հրապարակային ցուցադրումը, սակայն օրենքում դրանց հստակ և ամբողջական ցանկ չկա։ Ոստիկանության պարզաբանմամբ՝ յուրաքանչյուր դեպքում պետք է հաշվի առնել ոչ միայն գրությունը կամ խորհրդանիշը, այլև դրա օգտագործման նպատակը և ընդհանուր համատեքստը։