Թեհրանի կոշտ նախազգուշացումը Պարսից ծոցի երկրներին

Իրանի զինված ուժերի գլխավոր շտաբի պետ Ալի Աբդոլլահին Պարսից ծոցի երկրներին կոչ է արել ԱՄՆ-Իրան հակամարտության ընթացքում չաջակցել Վաշինգտոնին։

Նրա խոսքով՝ ամերիկյան զինված ուժերին ցուցաբերվող ցանկացած օգնություն կամ աջակցություն Թեհրանը կդիտարկի որպես համագործակցություն ԱՄՆ-ի հետ։

«Մենք զգուշացնում ենք, որ ագրեսորին՝ ամերիկյան զինվորականներին, ցուցաբերվող ցանկացած օգնություն կամ աջակցություն կդիտարկվի որպես համագործակցություն ամերիկյան զինված ուժերի հետ»,- հայտարարել է Աբդոլլահին։

Իրանցի զինվորականը նաև նշել է, որ տարածաշրջանում ԱՄՆ-ի իրականացրած որևէ գործողություն չի վրիպում Թեհրանի ուշադրությունից։

Նրա հայտարարությունը հնչել է տարածաշրջանում ԱՄՆ-ի և Իրանի միջև շարունակվող լարվածության պայմաններում։ Թեհրանը վերջին շրջանում բազմիցս զգուշացրել է տարածաշրջանի երկրներին՝ չտրամադրել իրենց տարածքը կամ ենթակառուցվածքները ամերիկյան ռազմական գործողությունների համար։