134 մլն դրամ՝ համայնքապետի տեղակալի հոր նորաստեղծ ընկերությանը․ «Հետք»

Արենի համայնքի ղեկավարի առաջին տեղակալ, «Քաղաքացիական պայմանագիր» կուսակցության անդամ Մհեր Ասատրյանի հոր՝ Խաչիկ Ասատրյանի հիմնադրած «Էմ էյ շին» ՍՊԸ-ն հիմնադրումից ամիսներ անց Արենիի համայնքապետարանից ստացել է ընդհանուր 134 մլն դրամի 4 պայմանագիր․ փոխանցում է Հետքը։

«Հետքի» տվյալներով՝ 2025 թվականի դեկտեմբերին հիմնադրված ընկերությունն առաջին պայմանագիրը համայնքապետարանի հետ կնքել է 2026 թվականի ապրիլին՝ Գնիշիկ բնակավայրի խմելու ջրագծի կառուցման աշխատանքների համար։ Պայմանագրի արժեքը կազմել է 5.4 մլն դրամ։

Այնուհետև հունիսին ընկերությունը համայնքապետարանի հետ կնքել է ևս երեք պայմանագիր։ Դրանցից 43.3 մլն դրամանոցը վերաբերում է Ռինդ և Արփի բնակավայրերի ոռոգման ջրագծերի կառուցմանը, 59.5 մլն դրամանոցը՝ Ռինդի ոռոգման ներքին ցանցի մեկ հատվածի կառուցմանը, իսկ 25.6 մլն դրամանոց պայմանագիրը՝ Ռինդում ջրային ենթակառուցվածքների կառուցման և վերանորոգման աշխատանքներին։

Մհեր Ասատրյանը «Հետքի» հետ զրույցում նշել է, որ ընկերությունը նոր է հիմնադրվել, սակայն իր հայրը երկար տարիներ զբաղվել է շինարարությամբ։ Նրա խոսքով՝ մրցույթները եղել են բաց, և ընկերությունը մասնակցել ու հաղթել է սահմանված ընթացակարգով։

Ըստ հրապարակման՝ պայմանագրերից մեկի դեպքում «Էմ էյ շին»-ը եղել է մրցույթի միակ մասնակիցը։