Սարսափելի վթար Արմավիրում․ «ԳԱԶ»-ը գլխիվայր վերածվել է ջարդոնի, «Kia»-ն հայտնվել ծառերի մեջ․ 4 վիրավոր

Այսօր՝ օգոստոսի 19-ին, խոշոր ավտովթար է տեղի ունեցել Արմավիրի մարզում։ Ժամը 15։50-ի սահմաններում Երևան-Արմավիր ավտոճանապարհի՝ Մայիսյան գյուղի վարչական տարածքում բախվել են «Kia» և «ԳԱԶ 3108» մակնիշի ավտոմեքենաները․ հայտնում է Շամշյանը։

Բախման հետևանքով «ԳԱԶ 3108»-ը դուրս է եկել վերահսկողությունից, հայտնվել գլխիվայր և երթևեկելի գոտում վերածվել մետաղե ջարդոնի, իսկ «Kia»-ն հայտնվել է ճանապարհամերձ ծառերի մեջ։

Վթարի հետևանքով 4 մարդ տարբեր աստիճանի մարմնական վնասվածքներով տեղափոխվել է «Արմավիր» բժշկական կենտրոն։ Մինչ շտապօգնության ժամանումը տուժածներին օգնություն են ցուցաբերել քաղաքացիները, իսկ բժիշկները տեղում առաջին բուժօգնություն են ցուցաբերել։

Դեպքի վայրում աշխատել են փրկարարներն ու պարեկները։ Փրկարարները հոսանքազրկել են ավտոմեքենաները և իրականացրել հերթապահություն, իսկ պարեկները սահմանազատել են տարածքը։

Դեպքի առթիվ Քննչական կոմիտեի Արմավիրի մարզային քննչական վարչությունում նախաձեռնվել է քրեական վարույթ։ Պարզվում են վթարի հանգամանքները, ինչպես նաև մեքենաների սեփականատերերի, վարորդների և վիրավորների ինքնությունը։