Փի Դիդին՝ Թուփաքի սպանության գործի նոր թիրախ

Ամերիկացի ռեփեր Շոն «Փի Դիդի» Քոմբսը կարող է քրեական մեղադրանքի առաջ կանգնել Թուփաք Շակուրի սպանության գործով, եթե դատարանը մեղավոր ճանաչի Դուեյն «Քիֆի Դի» Դևիսին։ Այս մասին հայտնում է The Telegraph-ը՝ վկայակոչելով իրավական աղբյուրների։

Դևիսը մեղադրվում է 1996 թվականին Լաս Վեգասում Թուփաքի սպանությունը կազմակերպելու մեջ։ Գործում որպես ապացույց օգտագործվում է նաև 2008 թվականին ոստիկանության կողմից գաղտնի ձայնագրված զրույցը, որի ընթացքում Դևիսը, ըստ հրապարակման, պնդել է, որ Քոմբսը իրեն առաջարկել է 1 միլիոն դոլար՝ ռեփերին սպանելու համար։

Դևիսը այժմ պնդում է, որ այդ հայտարարությունները սուտ են եղել և արվել են սեփական հեղինակությունը բարձրացնելու նպատակով։ Քոմբսը ևս հերքել է իր մասնակցությունը՝ մեղադրանքներն անվանելով «ամբողջությամբ հորինված և ծիծաղելի»։

Իրավական աղբյուրների խոսքով՝ Դևիսի մեղավոր ճանաչվելու դեպքում նրա ցուցմունքները կարող են հիմք դառնալ Քոմբսի նկատմամբ հետագա գործողությունների համար։ Միևնույն ժամանակ, ոստիկանությունը Քոմբսին առայժմ Թուփաքի սպանության գործով կասկածյալ չի հայտարարել։