Բրիտանիայում «կանաչ հարկը» կարող է հարվածել ֆերմերներին ու բարձրացնել սննդի գները

Մեծ Բրիտանիայի ֆերմերները կարող են բախվել պարարտանյութի գների կտրուկ աճի՝ 2027 թվականի հունվարից նախատեսվող ածխածնային նոր հարկի պատճառով։ The Telegraph-ը գրում է, որ նոր մեխանիզմի ներդրումից հետո պարարտանյութի գները որոշ դեպքերում կարող են կրկնապատկվել։

Խոսքը Carbon Border Adjustment Mechanism-ի (CBAM) մասին է, որը նախատեսում է ածխածնային վճար ներմուծվող մի շարք ապրանքների, այդ թվում՝ պարարտանյութի համար։ Գիտական հետազոտության համաձայն՝ դրա հետևանքով ֆերմերների եկամուտները կարող են նվազել մինչև 8 տոկոսով, իսկ պարարտանյութի գինը՝ կրկնապատկվել։

Բրիտանիայի ֆերմերների ազգային միությունը կոչ է անում կառավարությանը հետաձգել հարկի ներդրումը՝ զգուշացնելով, որ այն կարող է մեկ տոննա պարարտանյութի արժեքը բարձրացնել մինչև 70 ֆունտով։ Ֆերմերների վրա ճնշումն արդեն մեծացել է՝ շոգի և երաշտի պատճառով, որը սպառնում է այս տարվա բերքին։

Ֆերմերները նաև զգուշացնում են, որ պարարտանյութի թանկացումը կարող է հանգեցնել սննդամթերքի գների բարձրացման։ Կառավարությունը, սակայն, պնդում է, որ CBAM-ի ներդրման սկզբնական ազդեցությունը սահմանափակ կլինի և չի ակնկալում, որ այն բրիտանացի ֆերմերներին էական մրցակցային վնաս կհասցնի։