Փաշինյանի կուսակցությունը նախատեսում է վերափոխել և խորացնել Ռուսաստանի հետ հարաբերությունները. Lenta.ru

ՀՀ վարչապետ Նիկոլ Փաշինյանի «Քաղաքացիական պայմանագիր» կուսակցությունը երկրի առաջիկա հինգ տարիների զարգացման ծրագրում ներառել է Ռուսաստանի հետ «գործընկերային հարաբերությունների վերափոխման և խորացման» դրույթը։ Համապատասխան նախագիծը հրապարակվել է ՀՀ էլեկտրոնային կառավարման միասնական հարթակում։

«Ռուսաստանի Դաշնության հետ փոխշահավետ, բազմաոլորտ համագործակցությանն ուղղված երկխոսությունը կշարունակվի և միտված կլինի հարաբերությունների վերափոխմանը, զարգացմանն ու խորացմանը»,- նշվում է փաստաթղթում։ Ծրագրում ընդգծվում է նաև Ռուսաստանի հետ գործընկերությունը «հավասարակշռված արտաքին քաղաքականության նոր պայմաններում» զարգացնելու, ինչպես նաև Եվրասիական տնտեսական միության շրջանակում արդյունավետ համագործակցությունը շարունակելու անհրաժեշտությունը։

Միաժամանակ, ծրագրում հիշատակված մյուս գործընկերների՝ Ֆրանսիայի, ԱՄՆ-ի և Եվրամիության հետ հարաբերությունների վերաբերյալ օգտագործվում են «ամրապնդում» կամ «համագործակցության խորացում» ձևակերպումները։