Ուռուցքաբանը հերքել է պարանոցին օծանելիք քսելու և քաղցկեղի առաջացման միջև կապը

Պարանոցին օծանելիք քսելը քաղցկեղ է առաջացնում՝ նման պնդումը գիտականորեն ապացուցված չէ։ Այս մասին NEWS.ru-ին հայտնել է ուռուցքաբան Բասիր Բամմատովը։ Նրա խոսքով՝ նույնիսկ եթե օծանելիքի որոշ բաղադրիչներ լաբորատոր պայմաններում կենսաբանական ակտիվություն են ցուցաբերում, դա դեռ չի նշանակում, որ պատրաստի արտադրանքի սովորական օգտագործումը կարող է ուռուցք առաջացնել։

Բժիշկը բացատրել է, որ մաշկը նյութերի՝ անմիջապես արյան մեջ ներթափանցման ուղի չէ, իսկ օծանելիքի բաղադրիչների ներծծման աստիճանը կախված է արտադրանքի բաղադրությունից և մաշկի պաշտպանիչ շերտի վիճակից։ Վահանաձև գեղձի՝ պարանոցի հատվածում գտնվելը նույնպես հատուկ պայմաններ չի ստեղծում օծանելիքի բաղադրիչների՝ անմիջապես այդ օրգան ներթափանցելու համար։

Միաժամանակ օծանելիքը կարող է որոշ մարդկանց մոտ ալերգիա կամ մաշկի գրգռում առաջացնել, հատկապես վնասված կամ արդեն գրգռված մաշկին քսելու դեպքում։ Մասնագետը խորհուրդ է տվել օգտագործել օրինական և ստուգված արտադրանք, խուսափել աչքերի ու լորձաթաղանթների հետ շփումից, իսկ քորի, այրոցի կամ կարմրության դեպքում անմիջապես դադարեցնել օգտագործումը։