Մոսկվայի ամենաթանկ պենտհաուսի արժեքը հասել է 30 միլիոն դոլարի

Մոսկվայի երկրորդային շուկայում վաճառքի հանված ամենաթանկ վերանորոգված պենտհաուսն արժե 30 միլիոն դոլար՝ մոտ 2,5 միլիարդ ռուբլի։ Այս մասին ՏԱՍՍ-ին հայտնել են «Intermark քաղաքային անշարժ գույք» ընկերության փորձագետները։

Պենտհաուսը գտնվում է Մոսկվայի հեղինակավոր «Ոսկե մղոն» թաղամասում և վաճառվում է փակ ձևաչափով։ Մեկ քառակուսի մետրի արժեքը մոտ հինգ միլիոն ռուբլի է։ Բնակարանի ընդհանուր մակերեսը, ներառյալ պատշգամբը, կազմում է 460 քառակուսի մետր։

Պենտհաուսն ունի համայնապատկերային պատուհաններով հյուրասենյակ, խոհանոց-ճաշասենյակ, գինու սենյակ և երեք ննջասենյակ։ Գնորդին կտրամադրվի նաև երեք կայանատեղի ստորգետնյա ավտոկայանատեղիում։